Roskilde nersualaarpaat
Roskilde Kommunep nukippassuit atorlugit Nunarput nutaaliaasoq danskinut takutinniarmagu nersornaqaaq. Roskildemi ”Inuit Nu”-mik taallugu - kalaallisooraanni, Inuit Ullumikkut, kulturimik pikialaartitsineq taama nalilerneqarpoq.
Pisut, kulturimut tunngasut, Nunatsinniillu saqqummiussisut 85-it Roskilde Kommunep aaqqissuummagit Kalaallit Nunaata Københavnimi Sinniisoqarfiani nuannaarutigineqarpoq.
- Nalunngilarput, Kalaallit Nunaanni pissutsit kulturerpullu qallunaanit ilisimaneqarnerat killeqangaartartoq. Taamatut Sjællandermiunut aaqqissuussineq Nunarput pillugu paasissutissaqarnerulernissamut iluaqutaalluassaaq. Minnerunngitsumillu kalaallit qallunaallu ikinngutigiinnerannut nukittorsaataassaaq, Kalaallit Nunaata Københavnimi Sinniisoqarfiani pisortaq, Tove Søvndahl, oqarpoq.
Isumaqarpoq kulturimik pikialaartitsinikkut Nunatta nutaaliasup kusanartumik saqqummiunnissaa, Roskildep Kommuneata iluatsissimagaa.
- Eqqumiitsuliortut inuusunnerusut nittarsaannissaat pingaartinneqarsimavoq. Aammalumi oqalugiartussat Nunatsinni ullumikkut pissutsit sammisussaallugit, Tove Søvndahl Pedersen oqarpoq. Taanna Nunatta namminersornera pillugu Roskildemi atuakkanik atorniartarfimmi maajip arfineq aappaani oqalugiassaaq.
Aamma Københavnimi Kalaallit Illuutaanni kulturimik paasissutissiinermillu suliaqartoq, Vivi Nielsen, Roskildemi pisunik nuannaarutiginnippoq.
- Isumaqarpunga, Roskildemit ajunngilluinnartumik aaqqissuisimasut. Aamma piffissamininnguaq atorlugu taamarujussuaq aaqqissuinerat, assorujussuaq torrallaaneruvoq. Danmarkimi Kommuninut allanut maligassiuipput, Vivi Nielsen oqarpoq.
Roskildep Kommuniata kulturisiornissamik pilersaarusioqqaalernerani sunik aaqqissuisoqarnissaanik Kalaallit Iluanniit siunnersuuteqartarlutik ikiuussimapput. Vivi Nielsenilu Tove Søvndahl Pedersenitulli oqarpoq, Kalaallit Nunaata nutaaliasup assigiinngiiaartullu saqqummiunnissaa Roskildep Kommuniata iluatsissimagaa.
- Qallunaarparujussuit suli eqqarsartaramik, uagut Nunatsinni qanga itsartut inuusugut. Nalinginnaasumik inuusugut aammalu piffik nutaaq nunatsinni atuulluinnartoq, taamaalillugu Roskildemi ersersimmassuk nuannaarutigaarput, Vivi Nielsen oqarpoq.
