Rosing: Nunaqarfiit namminiissapput
Michael Rosingip isornartorsiorneqarnini illersorlugu oqarpoq, neriuutiginngikkini nunaqarfiit matuneqassasut isummatillu assigiittut naqissuserlugu:
- Nunaqarfiit inuerunnissaat kissaatiginngilarput, illuatungaaniilli suliffeqalernissaa niuertoqalernissaalu kissaatigaarput taamaisiornikkullu nunaqarfiit ataavarnissaat kissaatigalutigu. Taamaattumik Stenilu anguniakkagut assigiipput, taamaallaat isumaqatigiinngissutigaarput nunaqarfinni pilersuineq pitsaasuunersoq ajoqutaanersorluunniit, Michael Rosing oqarpoq.
Michael Rosingip ullumikkut aqutsineq qanga nunarput Danmarkimiit minnerusumik annerusumilluunniit aquneqarallarmat assersuusiorfigaa, oqarlunilu nunaqarfimmiut imminut pilersorsinnaasut:
- Nunatsinni ingerlanneqartussat aalajangiussarpassuit siullermik Københavnimiit aalajangiunneqartarput. Maannakkut taamatoqqissaaq ingerlatsisoqarpoq, soorlu nunaqarfinni suut pisiassaassanersut qanorlu pisiassat akeqassanersut aalajangersorneqarlutik. Nunaqarfinni aalajangiunneqarsinnaagaluartut qimarngutinneqartarput, Michael Rosing oqarpoq.
Taamaattumik politikkikkut Nuummiit aqutsineq unitsittariaqartoq Michael Rosingip taakkartorpaa, oqaatigaalu nunaqarfiit namminneq niuerneq ingerlannissaanut periarfissiisoqartariaqartoq.
