Rosie Pope Kalaallit Nunaannut tikippoq

- Kræftip nappaatigineqartarnera puigoqqunngeqaara, siunertaraara nunarsuarput kaajallallugu arpakkuma inuunernik annaasseqataasinnaallunga, taama nassuiaavoq arnaq atuakkiortoq 61–inik ukiulik Tuluit Nunaanni Wales-imeersoq Rosie Swale Pope, Nalunami Kuultisiorfiup timmisartumut attartugaanut Canadamiit tallimanngormat Narsarsuarmut tikeqataareerluni.
Allattoq Mads Lynge
januaarip 28-at 2008 11:46

- Avannaanukarusuppunga aamma Kulusummukarusuppunga tassanngaanniit Reykjavikimut timmisartumut ilaassagama, Rosie Swale Pope oqarpoq.

- Sermersuup itivinnissaa piffissakilliornera pissutigalu angumerisinnaagunanngilara, Rosie Swale Pope isumalluarpaloqisoq nangippoq.

Kalaallit Nunaaliannginnermini ilisimareernerarpaa inoqarfimmiit inoqarfimmut pisussinnaanani, kisianni taamaakkaluartoq timmisartorluni nunatta aqqusaarnissaa pilersaarutigisimanerarpaa.

- Kalaallit Nunaaniinninni pilersaarutigineruvara, sapinngisannik inunnik amerlasuunik naapitsinissara, tassa maani Narsarsuarmiinini aammalu Nuumiinninni. Qanoq inooriaaseqarneq aammalu kulturi paasisaqarfigerusullugu. Imaasinnaavoq sapaatit akunnerini marlunni pingasuniluunniit Kalaallit Nunaaniissasunga. Taava Islandiliassaanga sapersaatiginngilluinnarunakkannillu Island qupillugu arpanniarpunga, Rosie Swale Pope oqaluttuassaqaraluaqisoq taama naggasiivoq.

Rosie Swale Pope-p pileraarutiginerarpaa nunarsuarmik kaajallaalluni arpannini atuakkiariniarlugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq