Assi: DR/Bjarne Bergius Hermansen

Rosap angutaa Tittus Karlsenimik ateqarpoq Kujataaneersuullunilu

Rosa isiginnaagassiami aliikkutassiaanerusumi "Den store bagedyst"-imi peqataasimasoq kalaaliunersoq apeqqutigineqartarsimavoq. Kalaaliusorlu maanna paasinarsivoq.

Rosa affarmik kalaaliuvoq. Tamanna TV2-p aallakaatitassiaani "Rosas Grønlandske Hemmelighed"-imi, Juullerujussuarmi aallakaatinneqartumi, saqqummiunneqarpoq.

Kikkullu siuaasarinerlugit Rosap paniata Trinep paaserusussimagaa, Rosap KNR-imut oqaatigaa:

- Paasiniarneqarnissaa taassuma pingaartitariuarpaa. Oqartuartarpormi: Anaana, ilumoorsinnaanngilaq oqaluttuassartaata tunuliaqutaa paasisimanngikkipput, Rosa panini pillugu oqarpoq, paasiniarneqarnissaalu pingaartitariuarsimagaa oqaatigalugu.

Rosa Kildahl paninilu taava Nunatsinnukarput, Rosa siuaasaminik misissuiartortoq tv-kkut aallakaatitassiarineqarluni. Ateq Kujataanilu sumiiffik paasissutissatuaralugit nunatsinnukarput.
Naallu paasiniaasoqarnissaa pillugu pania sukataaruteqartuugaluartoq, apeqqutit akissutissarsineqarnissaat namminermut pingaaruteqarsimasoq, Rosap oqaatigaa:

AAMMA ATUARUK Rosa Bagedystenimeersoq nunatsinneersuua?

- Paasisaqarneruleriartortilluta, oqaloqateqartarlutalu, apeqqutit akissutissarsineqarnissaat nammineq pingaaruteqartilerlugu malugilerpara, Rosa oqarpoq.

Oqaluttuarisaanermik ilisimatusarsimasoq, Nunattalu Allagaateqarfia peqatigalugit, oqaluffinilu allagaatit aqqutigalugit Rosap angutaata ilaqutaanik nassaartoqarpoq.

- Aqqa takugakku, arnaalu Rosamik aamma ateqartoq takullugu qanilliallaqaaq, Rosa oqarpoq.

Angutaa toqoreersoq paasereerlugu, Rosap aamma paasivaa aanaminit atsiunneqarsimalluni, soorlu aamma angutaata Rosa uumasoq ilisimasimagaa, Rosallu peroriartornera malinnaavigisimagaa, Rosap ilisimanngisaanik.

Rosa angummi jornguisa ilaannik Qaqortumi naapitaqarpoq. Tassuma Rosamut oqaluttuaraa Tittus Karlsen Rosap meeraneraniit assinganik toqussi tikillugu peqarsimasoq.

Rosa pillugu oqaluttuaq uani atuarneqarsinnaavoq: tv2.dk

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat