Roger Waters Roskilde-Festivalimut

Nipilersortartut tusaamaneqarluartut oqaluttuarisaanermi pingaaruteqartut aasaq manna Roskilde Festivalimi tusarnaartitsissapput. Roger Watersip Pink Floydikkut atugaat ”Dark Side of the Moon” tusarnaatitsinermi atussavaa.

Tuluit nipilersortartui, Pink Floydikkut, 1985-imi qimannissaata tungaanut Roger Waters nipilersortartoqatigiinni qimuttutut isigineqartarpoq. Pink Floydikkut qimareerlugit arlaleriarluni kisimi saqqummersitsisarpoq.

Festivalimik aaqqissuisut nalunaaruteqarput Roger Watersip Pink Floydikkut atortagaannik nuannarineqarnerpaat atorniarlugit pilersaaruteqartoq kiisalu kisimi saqqummersitsisarnermini atorsimasami ilai nipilersorniarlugit pilersaaruteqarluni. Roger Watersilli immikkut ittumik ”Dark Side of the Moon” tamakkerlugu atorniarpaa.

Nuuteq 1973-imi saqqummersoq 40 millionit sinnerlugit tunineqarsimavoq amerikamilu Billboardimik piginnittut naapertorlugit USA-mi nuutinit nuannarineqarnerpaanit 200-init sivisunerpaamik nuannarineqarsimavoq, sapaatip akunneri 1285-t nuannarineqarnerpaatut taaneqartarsimavoq, tassa ukiut 25-ingajaat.