Rockivimmik nipilersorneq
Nipilersornermut millioni ataaseq angungajallugu missingersuuteqarluni ulluni pingasuni festivalertitsinissaq najukkami aningaasaliisunit ikiuisoqarsimanngitsuuppat iluatsissinnaasimanavianngikkaluarpoq. Aningaasaliisut quliusut aningaasaliissutitik assigiinngitsutigut atorluarpaat, sapaatit akunneratalu naanerani festivalertitsinermi aningaasaliisut atorluaanerpaartaat tassaavippoq Carlsberg.
-Aningaasaliissuteqarnitsinnut peqatigitillugu pisoqartitsinissarput uatsinnut pissusissamisuuginnarpoq. Festivalertitsinermi matumani sapaammi tusarnaartitsinissanut isissutissanik marlussoriarluta unammisitsivugut, aamma teqeqqut ilaanni assiliisarfeqartitsivugut, tassanilu tusarnaariat inuusuttut peqatigalugit assilitissinnaapput. Nivissat kusanarluinnartut angullu inuusuttoq timigilluinnartoq pissarsiarisimavagut, takusinnaasattullu assileqatiginiarlugit inuit ussattorsuupput, Ole Sørensen, Carlsbergip Kalaallit Nunaanni suliniutaanut akisussaasuusoq oqaluttuarpoq.
Katuami nipilertunik aaqqissuussisoqartillugu nalinginnaasumik eqqissimasumik ingerlasoqartarpoq, tallimanngornermilu tusarnaartitsinerit aamma taama ipput. Ilaatigullu angutikullassuit 14-it tusarnaartitsinerit nalaanni isumannaallisaanermik isumaginnittuunerinik tamanna nassuiaatissartaqarpoq.
-Isissutissanik tuniniaaqqaanermi isissutissat 800-t tunineqarsimasuuppata paarsisut 12-iutissimassagaluarpagut, isaariamilu isissutissanik pisisut 100-nik ilagaangata paarsisut ataatsimik ilasarpagut. Paarsisut ilaat aalajangersimasumik nikorfaffeqartarput ilaallu angalaartarlutik. Suleqativut takusinnaajuaannarpagut, taamaammat perulluliortoqalissagaluarpat ingerlaannaq akuliutipallassinnaalluta. Taamaaliornikkut pisut ingatsinnginnerini unitsissinnaasarpagut, aamma tusarnaariaq anisiinnarnagu eqqissisarlugu oqaloqatigerusunneruara, Kasper Hedegaard, unnuk manna isumannaallisaallutik paarsisut ilaat nassuiaavoq.
Tallimanngornermilu aaqqissuussinermut tusarnaariat sisamanik kisitsisitalinnik amerlassuseqarmata aaqqissuisup Ejvind Elsnerip aningaasaqarnikkut nammassinnaarpasippaa, aaqqissuisorlumi nuannaartoq qungujulasorlu Sumep naggataarluni appimmat knr.gl-ip oqaloqatigaa.
-Inuit unnuk manna qanoq nuannisartigisut takusinnaallugit nuannaarutigeqaara. Aaqqissuussineq qaammaterpassuarni piareersaateqarfigaara, piffissallu ingerlanerani unamminartut aqqusaarsimasagut nipilersorneq aallartikkaangat inuillu nuannisaleraangata peeruttarput. Ulluni tulliuttuni marlunni Katuap ulikkaaqqinnissaa neriuutigaara, taamaaliornikkummi aappaagu Nuummi nipilersornikkut aaqqissuussinerit annersaannik aaqqissuinissamut periarfissaqarsinnaalissagama, Ejvind Elsner oqarpoq.
Angutit arnallu utoqqasaat, inuusuttullu Sumep 70-ikkunni aallartinneranni suli inunngorsimanngitsut erinarsoqatigiipput. Tamannalu Kalaallit Nunaata Lennon aamma McCartneyiinut, Malik Høeghimut Per Berthelsenimullu, tallimanngormat unnukkut nipilersoqatitik arfinillit peqatigalugit Katuami pikkunavissumik tusarnaartitsigamik, nersornaataavoq. Naak utoqqalingajaleraluarlutik Malik Høegh tusarnaartitsivimmi suli aallaamavoq Per Berthelsenillu kitaariminik innaallagiamoortumik sukaativillugu ataasiakkaarisinnaalluni. Sume 70-ikkunni Kalaallit Nunaanni rockimik nipilersortalernermut aallarniutaapput, ukiullu 40-t qaangiukkaluartut rockimik nipilersornermi suli anguneqarsimanngillat.
