Rockimik nipilersortartoq Chris Cornell tassanngaannartumik toqusoq

Amerikamiu rockimik nipilersortartoq tusaamasaq, Chris Cornell,  52-inik ukioqarluni toquvoq. Nutaarsiassaqartitsivik Reuters taama allaaserisaqarpoq.

Nipilersortartoq rockimik nipilersoqatigiinni Soundgardenimi erinarsortuusimavoq. Tassanngaannartumillu toqunera ilaqutaasunit ilisimatitsissutigineqarpoq.

Chris Cornell ateqavippoq Christopher John Boyle. 1990-ikkut naalernerat tikillugu Soundgardenimi erinarsortuuvoq, 2000-kkunnilu nipilersoqatigiinni Audioslavemi erinarsortuulluni. Soundgarden kingorna aamma aallarteqqikkaluarput.

Rockimik nipilersortartup saqqummersitaani nuannarineqarnerpaat ilagaat "Black Hole Sun", nipilersoqatigiinnit Soundgardenimit 1994-imi saqqummersinneqartoq. Erinarsuullu taanna rockimik sakkortuumik saqqummersitani pitsaanerpaatut Grammynnatsinneqarpoq.

Erinarsuut taanna Soundgardenip saqqummersitaani siullermiippoq. Nuusiamilu tassani aamma erinarsuut "Spoonman" metalimik nipilersoriaatsimi pitsaanerpaatut kingorna Grammynnatsinneqarluni.

Soundgardenimi nipilersortut ukiuni 13-ini atareerlutik 1997-imi avissaarput Chriss Cornellilu kisimiilluni ingerlaannarpoq.

Saqqummersippaalu "Euphoria Morning", aappassaanillu saqqummersitsisussanngorluni Cornell naaggaarsinnaanngisaminik neqeroorfigineqarpoq.

Tom Morello, Tim Commerford aamma Brad Wilk peqatigalugit nipilersoqatigiit Audioslave 2001-imi pilersippai. Nipilersoqatigiit 2007-imi avissaarnissamik tungaanut pingasunik nuusiaqarput, Cornellip nipilersornikkut aaqqiagiinngissuteqarneq pissutigalugu nipilersoqatigiit taamani qimappai.

Cornell nammineerluni marlunnik saqqummersitseqqippoq, Soundgardenilu 2010-mi katersuuteqqipput 2012-imilu saqqummersippaat "King Animal".

Chris Cornell Seattlemi peroriartorpoq. Nuliarisimasani Soundgardenillu managererisimasaa Susan Silver paneqarfigaa, maannalu nuliarisani Vicky Karayiannis erneqarfigalugu.

/ritzau/