Rockfestivalimut aningaasaliissutit politikerit assortuussutigaat

Aasianni kommunalbestyrelsimut ilaasortaq Ane Hansen, kommunip pikialaartitsisoqarnissaanut atatillugu kommunip aningaasaliissutai 800.000 koruunit qanga akuerineqarsimanersut paaserusuppai. Aasiaat Rockfestival sapaatip akunnerata naanerani Aasianni ingerlanneqartussaq, kommunimit aaqqissuunneqartussaavoq.
septembarip 11-at 2008 11:51

Borgmester Enok Sandgreen oqarpoq junip 30-ani kommunalbestyrelsip ataatsimiinnerani, ukioq manna Nipiaa Rockfestivali ingerlanneqarnianngitsoq, kommunalbestyrelsimi ilaasortap Ane Hansenip oqaatigimmagu, nammineq aatsaat paasisimagini.

- Aaqqissuisoqarniannginnera paasigatsigu 2002-imi aaliangersimaneq malillugu 75.000-inik aningaasaliivugut, Enok Sandgreen oqarpoq.

Taassuma erseqqissaatigaa kommunalbestyrelsi illoqarfimmi susassaqartitsinngippallaarnerarlugu uparuartorneqartartoq. Enok Sandgreenip aamma ajuusaarutigaa pisussaq aallartittorlu politikerinit apeqquteqaatit aatsaat takkussuummata. Taanna isumaqarpoq ukioq manna aningaasassaqarlualeramik politikerit ilaannit killiliiniartoqarnera aallattaaliuisoqarneralu nammineq inuttut soqutigisanik aallussinerusoq politik-ernerunanili.