Rockertartut nalliuttorsiortut
Erinnat tusaqqoornartut "Kalaaleqat", "Qimusseq" aamma "Inneruulatut naajorarpugut" sanasui maanna ukiuni 35-ni rockimik nunatsinni nipilersorsimalerput.
Pineqartut tassaapput Aasiammiut nipilersoqatigiit "Inneruulat" ukiunik 35- nngortorsiortut. Nalliuttorsiorneq malunnartinniarlugu tusarnaartitsineq pivoq Aasiaat katersortarfianni apriilip aallaqqaataani. Tassanimi aammalu inuusuttut ornittagaanni "Igdlo"-mi Inneruulat 70-ikkunni aallarteqqaarnerminni tusarnaartitsisarsimaqaat.
Nipilersoqatigiillu nunatsinni ilisimaneqarlualerput oqaluttartup nuussua "Aasivik '79 - Qangattarsa qangattarsartigut" saqqummermat tassanilu nipilersoqatigiit ataasiakkaarlutillu appisimaartartut arlallit immiusseqataapput. Nipilersoqatigiit namminneq nuusiaat siulleq "Inneruulatut naajorarpugut" 1980-mi saqqummerpoq taassumalu kingorna aamma saqqummersippaat "Inuummartoqaat" kiisalu "Qaartartut".
Inneruulat tusarnaartitsisarneri akuttorsimagaluarput, kisianni nipilersuleraangata allaaneq ajorpoq cd-mi "play" toorneqaannartoq. Tassami qanga atorneqartarnerisut suli erinnat taakku atortarmatigik.
KNR-TV-mi tusagassiortup Tungutaq Larsenip nipilersoqatigiit guitarertuat Kaaleeraaq Reimer nalliuttorsi0rluni tusarnaartitsinngilaattaa apersorpaa. Aallakaatitassiaq "Inngerut" aallakaatinneqassaaq ataasinngornermi nalunaaqutaq 20.00.