Robin Hoodip nuannarinnittai 1000-it sinneqalerput

Angut suliffeqanngitsoq Nanortalimmiu kukkunermik peqquteqartumik aningaasaateqaleriasaartoq, inunnullu pisariaqartitsisorisaminut agguaassisoq pillugu oqaluttuaq, inuppassuarnik attuivoq.
Allattoq Louise M. Kleemann
decembarip 07-at 2009 12:07

Tamanna facebookimi qupperniliami Robin Hood of Nanortalimmi takuneqarsinnaavoq, tassanimi tapersersuillutik ilaasortanngortut massakkut 1.427-nngoreerput.

Angut piffissami aggersumi eqqartuunneqartussaavoq, pineqaatissinneqannginnissaalu facebookimi tapersersortaasa piumasaraat. Assersuutigalugu angut akiliisussanngorlugu pineqaatissinneqassappat ikiorniarlugu aningaasanik katersuiniartoqassasoq tapersersortaasa ilaasa siunnersuutigaa.

Angutip 450.000 koruunit sapaatip akunnerini pingasuni atorpai. Umiatsiannguamik qarasaasiamillu pisivoq, ilaqutaalu tamarmik nutaanik mobiltelefonitaarlutik, Brugsenimi pisiniat qamutaat inunnut atorfissaqartitsisorisaminut immerpai, aqqusinermilu inunnut aningaasanik amigaateqassangatitaminut aningaasanik agguaalluni.

Sapaatilli akunneri pingasut qaangiummata nuannisarneq qaangiuppoq. BRF Bankimi inuup normuata kukkusumik toortarneqarsimanera aningaasallu allamukartuusut paasineqarmat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq