Robin Hoodimut suliaq kiisami naammassilerpoq
Danmarkimi eqqartuussiviit qullersaata Højesteretip qaqugu eqqartuussisoqarnissaa aalajangiuteqqammerpaa. Matumuuna ukiumi nutaami januaarip 18-iat aalajangiunneqarluni. Oktobarip qiteqqunnerani eqqartuussisoqartussaagaluarpoq, eqqartuussinissarli illersuisup Wilhelm Mallingip napparsimalerneratigut kinguartinneqartariaqarsimalluni. Naak tamanna Eqqartuussiviit Qullersaanni qaqutigooraluaqisoq.
Robin Hoodimik taagorneqartoq tassaavoq Angut Kleist. Taassuma aningaaserivimmi kontoa kukkunikkut Danmarkimi bankimit BRF Bankimit 1,3 millionit koruuninik ikisiffigineqarpoq. Aningaasat taassuma pissarigai aningaaserivimmit uppernarsarneqareersorlu, aningaasat eqquiniarnermit eqqugarisoralugit taassuma atorlugit aallartippai.
Angut Kleistip aningaasat ilaatigut ilaquttaminut tunissutinut aamma aningaasaateqanngitsunut aqqusinermi naapitaminut atorlugit aallartikkaluarpai.
Nassaaminik suli inulimmik inatsisinik unioqqutitsilluni atuisimasutut, Nanortalimmi eqqartuussivimmit aallaqqaammut pinngitsuutitaagaluarpoq, Nunattali Eqqartuussiviani nalunaaquttap akunnerini 100-ni inuiaqatigiinnik kiffartuussisussatut pineqaatissinneqarluni. Eqqartuussinerlu taanna Eqqartuussiviit Qullersaanut ingerlateqqinneqartoq januaarip 18-anni suliarineqartussanngorpoq.
