Robin Hoodimut suliaq aqagumut kinguartinneqarpoq
Robin Hoodimik taaneqartartumut, Nanortalimmeersumut, eqqartuussivimmi suliaq, Danmarkimi Eqqartuussiviit Qullersaanni ullaaq-manna suliarineqartussaagaluarpoq, taamaatiinnartariaqarlunili. Eqqartuussissuserisoq illersuisoq, Wilhelm Malling, napparsimalluni nalunaarmat suliassaq taamaatiinnarneqarallarpoq.
Allattoq Carla Davidsen
oktobarip 13-at 2011 06:47
Robin Hoodimik taaneqartartoq tassaavoq Angut Kleist. Taanna inuiaqatigiinni nalunaaquttap-akunneri 100-ni sulisitaasussanngorlugu Landsretimi eqqartuunneqarpoq, nassaaminillu unioqqutitsisumik atuisarsimasutut aamma eqqartuunneqarluni. Taannaluuna Eqqartuussiviit Qullersaanni suliarineqartussaagaluartoq. Angut Kleist Eqqartuussivimmit siusinnerusukkut pinngitsuutinneqarpoq.
Eqqartuussivimmi suliaq 2008-mi aallartippoq. Danmarkimi aningaaseriviit ilaannit 1,3 millionit koruunit Angut Kleistip aningaaserivimmi kontoanut kukkusumik ikineqarsimapput. Taakku atorluaqai, soorlu aningaasanik nunaqqatiminut agguaanikkut. Taamaammat Robin Hoodimik taagorneqalerpoq.
Eqqartuussivimmi suliassaq aqagumuugallartoq kinguartinneqarpoq.
