Robin Hoodimik ateruserneqarsimanini nuannarinngilaa
Suliaq 2008-mi aallartippoq, aningaaseriviup Danmarkimeersup BRF-ip aningaasat 1,3 millionit koruunit Angut Kleistip kontoanut kukkusumik taamanikkut ikisimammagit. Aningaasat taakku Angut Kleistip ilumut pigigai, BRF-ip oqarasuaatikkut uppernarsarpaa.
Nassaaminik suli inulimmik inatsisinik unioqqutitsilluni atuisimasutut, Nanortalimmi eqqartuussivimmit aallaqqaammut pinngitsuutitaagaluarpoq, nalunaaquttalli akunnerini 100-ni inuiaqatigiinnik kiffartuussisussatut Nunatta Eqqartuussiviani pineqaatissinneqarluni. Eqqartuussinerlu taanna Eqqartuussiviit Qullersaanut ingerlateqqinneqarpoq, ullumilu tassa suliarineqarluni.
Inuiaqatigiinni akunnerni 100-nik kiffartuussinissamik Nunatta Eqqartussiviata aalajangigaata sakkortunerulersinneqarnissaa, naalagaaffiup eqqartuussissuserisuata piumasaraa, pineqaatissinneqarsimasut inissiisarfianni qaammatini arfinilinni inissinneqarnissaa piumasaralugu.
Eqqartuussutip sakkukillineqarnissaa, illersuisup Wilhelm Mallingip piumasaraa, eqqartuussummut pineqaatissiinngikkallartumut allanngortillugu, imaluunniit inuiaqatigiinni akunnernik 100-nik kiffartuussinissamik eqqartuussinerup akunnernut 63-inut sakkukillineqarnissaa, illersuisuata piumasaraa, Angut Kleistimmi inuiaqatigiinni akunnerni 63-ini kiffartuussereermat.
Aningaaseriviit siunissami mianersornerulertariaqartut, Robin Hoodip illersuisuata Wilhelm Mallingip saqqummiussinermini oqaatigaa.
Angut Kleist Højesteretimi ullumi aalajangiinissamut peqataarusussimanngilaq, illersuisuatali sinnerlugu oqaaseqaateqarluni. Siornatigut nassuiaatigisimasani aalajangiusimavaa, tassa eqquiniaanermi eqquisimasutut isumaqarnini uteqqikkamiuk.
Suliap ingerlarnga namminermut ilungersunarsimanerarpaa, Robin Hoodimillu ateruserneqarsimanini akuersaanngilaa, taama ateruserneqarsimanini asissuinertut nalileramiuk.
