Robin Hood inuiaqatigiinnik 100 tiimini sullississaaq
Nutartigaq 18:30
"Robin Hood"-imut Nanortalimmeersumut tunngatillugu suliaq Kalaallit Nunaata Eqqartuussiviani ullumi inernilerneqarpoq. Inerniliinerli inummut nuannarineqaqisumut nuannerpallaanngilaq.
Ulluni 100-ni inuiaqatigiinnut sulisitaanissaminut eqqartuunneqarpoq, pinerluttunillu isumaginnittoqarfimmiit ukiuni marlunni nakkutigisassanngortinneqarluni, imigassamik atuinerminut katsorsarneqassaaq, kiisalu tarnikkut napparsimasut nakorsaannit misissugassanngorlugu eqqartuunneqarluni.
Angut Kleistip, "Robin Hood"-imik taaneqartartup, aningaasanik eqquiniaasitsinermi peqataasimanera Nunatta Eqqartuussivianit qularineqarpoq, Angut Kleistimi isumaqarsimavoq tassani eqquisimalluni. Aningaaserivimmiit pappialat misissornerini takuneqarsinnaasimanngilaq lotto-mik eqquiniaasitsinermi peqataasimanera.
Angut Kleist nuna tamakkerlugu 2008-mi tusaamaneqalerpoq aningaasarpassuarnik Kujataani agguaalermat. Aningaaserivimmi kontoanut 1,3 millionit koruuninik taamani ikisisoqarsimavoq, kukkunerlu aningaaserivimmit paasineqarpoq, 400.000 koruunit missaat Angut Kleistip atoreeraalu.
Angut Kleist umiatsiamik qarasaasiamillu ilaatigut pisisimavoq, ilaquttanilu tamaasa oqarasuaatinik angallattakkanik nutaanik tunivai, Brugsenimi pisiniat qamutaat inunnut atorfissaqartitsisorisaminut immertarsimavai, aqqusinermilu inunnut aningaasanik amigaateqassangatitaminut agguaasarsimalluni. Nuannisaarnerli kiperiataarpoq, aningaaseriviup BFR-ip kukkusimanini paasimmagu, pisiarineqarsimasullu tamaasa politiit arsaarinnissutigaat.
Robin Hood Nanortallip eqqartuussiviani ukioq kingulleq pinngitsuutinneqaraluarpoq, taamali aalajangerneq unnerluussisunit iluarineqarsimanngilaq, taamaammat Nuummi ullumi inaarneqarpoq.