Robin Hood Højesteretimi
Aningaasat 1,3 millioner koruunit Angut Kleistip Nanortaliminngaaneersup kontoanut aningaaserivimmit BRF Bankimit 2008-mi ikineqarput. Aningaasat taakkua suminngaaneersuunerat Angut Kleistip taamanikkut ilisimasimanngilaa.
Aningaaseriviup BRF Bankip aningaasarpassuit kukkusumik Angut Kleistip kontoanut ikinneqartut, Angut Kleistip pigigai aningaaseriviup taamanikkut uppersarpaa.
Angut Kleist Roobin Hoodimik taagorneqalerpoq, aningaasarpassuit aningaaserivimmi kontoanut ikineqarnerisa kingorna ilaquttaminut inunnullu naapitaminut aningaasanik pisariaqartitsisunut agguaanera pillugu radioaviisimi oqaluttuarineqarnerata kingorna.
Angut Kleistip nassaanik unioqqutitsilluni atuisimanera pillugu Nunatta Eqqarstuussiviani siorna januarip qaammataani pineqaatissinneqarpoq. Angut Kleist taamanikkut isumaqarsimavoq aningaasat Tysklandimi aningaasanik eqquiniaasitsinermit eqqorsimallugit.
Robin Hood Nunatta eqqartuussiviani siorna eqqartuunneqarami, akunnerni 100-ni inuiaqatigiinni kiffartuussisussatut pineqaatissinneqarpoq.
"Robin Hood" pillugu suliaq Danmarkimi eqqartuussiviit qullersaanni Højesteret-imi ullumi aalajangiiffigineqassaaq. Unioqqutitsisimaneq pillugu aalajangiisoqassanngilaq, Nunattali Eqqartuussiviani pineqatissiinerup sivisussusia aalajangiiffigineqassalluni.
