Ritap angutit unammillerpai
Avannaata Qimussersuanut anngunniunnermi aatsaat siullerpaamik arnamik peqataasoqartussanngorpoq. Tallimanngorpat sukkaniunnissami peqataasussaq tassaavoq Ikerasaarsummiu 28-nik ukiulik Rita Inûsugtok maanna Kangaatsiamut sukkaniuteqataajartorluni tikereersoq.
Rita Inûsugtok Avannaata Qimussersuanut anngunnissaminut periarfissaqarpoq anngunniuteqataasussat maannamut arfiniliinnaagallarmata tallimallu annguttussaallutik.
- Anngunnissaa ilimanarsinnaalluarpoq. Angutaa Kristian Inûsugtok qimussillaqqissorsuuvoq arlaleriarluni Avannaata Qimussersuanut annguttareernikuulluni. Taassuma piareersarnerani ikiorpaluppaa, taamaammat ilimasuppunga arnani siullersaalluni Avannaata Qimussersuanut anngussinnaasoq, Kangaatsiami qimussertartut peqatigiiffianniit Qimusseq 83-miit Ole Siegstad KNR.gl-mut oqarpoq.
Inuttaali nammineq annguteratarsinnaanerminut tunuarsimaarallarpoq.
- Sukkaniunnermi qanorluunniit pisoqarsinnaavoq. Qimmikka allat qamutaannik tusaasaqaleraangamik puullaaqilertaramik. Sanngusaassaguma ilakka siuangaatsiaannariaapput. Kisianni soorunami ajunnginnerpaamik neriuuteqarpunga, nalunartoqaqaarli, Rita Inûsugtok KNR.gl-mut oqarpoq.
Nammineq qimmini sungiusakkani aqqanillit atorlugit sukkaniuteqataaniarpoq. Anut pituuttallu nammineq suliarisimavai.
Anngunniuteqataasussat 35-40 kilometerit ingerlaffigissavaat. Unnia Kangaatsiami arnat arlallit piareersaateqartut illersuillutik iliuuseqarnissamut Rita Inûsugtup Nunatsinni arnani siullersaalluni Avannaata Qimussersuanut annguteriarnissaanut tapersersorlugu.
Rita Inûsugtok aamma arsaatillaqqissuuvoq aasarlu arnat pissartanngorniunneranni Disko 76-mut peqataalluni bronzennaqataalluni.
