Risskovimi uninngasunik qimaasoqaqqippoq
Tarnimikkut napparsimasut pinerluuteqarsimasunut inissinneqartarfianni uninngasut arlaqartut manna tikillugu qimaasareerput.
Uninngasut arlaqartut kalaaliupput.
Qaammatit kingulliit pingasut ingerlaneranni kalaallit Risskovimi uninngasuutigineqartut qulit qimaapput, Risskovimi uninngasut katillutik 17-it ukiormanna qimaasimallutik.
Danskit peqqissutsimut naalakkersuisuat Bertel Haarder tarnimikkut napparsimasut pinerluuteqarsimasunut inissiisarfiannut Risskovimiittumut ullumi pulaassaaq.
- Risskovimi pineqaatissinneqarsimallutik inissinneqartut ilaat inoqatiminnut ulorianarput, taakkua qimaasinnaanerat pinngitsoortinneqarsinnaasariaqarpoq, pisartormi akuerineqarsinnaanngilaq, Bertel Harder DR-ip nutaarsiassartitsivianut oqarpoq.
Inuusuttut marluk Risskovimit qimaasut aappaa politiinnit tigusarineqarpoq, tamannalu pivoq akunnerup ataatsip matuma siorna.