Risskovimi kalaallit inissinneqarsimasut qimarrattut
Inuit taakku arfinillit - angutit tallimat arnarlu ataaseq - matu tukertarlugu ammariarlugu, igalaaq aseroriarlugu, ungalut pisoqqat qulaallugit qimaasimapput. Politiit oqaatigaat qimaasuni taakkunannga tallimat pineqaatissinneqarnerminnut atatillugu inissinneqarsimasuusut, inoqatimminnullu ulorianartutut oqaatigineqartut, aviisimi Jyllands-Postenimi taama aallaaserinnittoqarpoq.
Taakku tamarmik immikkoortortami tanimikkut nappaatilinnut pineqaatissinneqarsimasunut, Namminersorlutik Oqartussanit inissinneqarsimapput. Immikkoortortaq taanna upernaaq apriili tikillugu eqqissisimalluinnartuusoq oqaatigineqarpoq.
- Kisianni qaammatini kingullerni pingasuni-sisamani inissinneqarsimasut nappaataat qimaarusussuseqarnerallu allanngoriaateqarujussuarpoq. Taamaattumik inissinneqarneranni isumannaallisaaneq naammannersoq misissorlugu aallartippugut, Gert Pilgaard Christensen oqarpoq.
Taanna isumaqarpoq, inissinneqarsimasut qimaanissartik pilersaarusiorsimagaat.
- Pilersaarusiugaalluartutut nalilerparput. Matukkut animmata, kalerrisaarut innaallagissamoortoq aallartinngitsoorpoq. Taamaattumik ajoquteqarnersoq imaluunniit aallartissinnaajunnaarlugu ajoqusersimaneraat misissulerparput, Gert Pilgaard Christensen oqarpoq.
Qimaagaluartut arfinillit tamarmik unnuaanerani ullaarmannalu politiinit tigusarineqarput. Ataaseq isikkamigut ajoqusersimasoq unnuap'qeqqata qaangilaarnerani tigusarineqarpoq. Sisamat imerniartarfimmi qanittumiittut, unnuaq nalunaaqutaq marlut eqqaanni nanineqarput, kingullerli ullaarmanna arfineq-marluk missaani aatsaat tigusarineqarluni.
Jyllands-Postenimi allaaserineqarpoq qimaasup tigusarineqartup kingulliup arnaq 21-nik ukiulik sikkilertoq uppisissimagaa persariniarsaralugulu aamma arnaq 51-inik ukiulik pinngitsaalillugu arneriffigeriaraluarsimagaa.
