Rio De Janeiromi ikiaroornartuerniartartoqatigiit akiorniarlugit piitsoqarfiit arfineq-marluk tiguarpaat
Brasiliamiut sakkutuui Rio De Janeiromi ikiaroornartuerniartartoqatigiit akiorniarlugit piitsoqarfiit arfineq-marluk tiguarpaat.
Politiit sakkutuullu ikiaroornartuerniaqatigiinnik sapaatip akunnerata naanerani akersuutileruttormata taama nipeqarpoq.
Rio de Janeiro takornariat karnevaleriarfigisartagaattut pisoorsuillu illoqarfiattut nunarsuarmi tusaamaneqarpoq. Inuit 1 millionit illoqarfiup killinnguani qaqqap innaani piitsoqarfinni arlalinni najugaqarput kiisalu pinerluttoqartarneq Rio De Janeirop aamma tusaamaneqaatigalugu.
Politiit ukiorpassuanngulersuni piitsoqarfiit angalaarfiginaveersaarsimavaat. Taakkunani ikiaroornartuerniartartoqatigiit pissaanermik tigumminnittuulersimapput sakkortusigaluttuinnartunillu sakkoqalersimallutik. Sakkutooqarfimmut tallimanngormat sakkunik tillinniartoqarnerata kingorna akersuunnerit aallartipput. Taamatullu akersuunnermi sukorseq 15-inik ukiulik aallaaneqarluni toqutaavoq.
-Oqartussat maani susassaqanngillat. Najugaqarfimmiittut eqqarnerminni toquttoorsinnaavaat, arnaq piitsoqarfiit ilaanni najugalik oqarpoq. Arnap taassuma suna eqqartornerlugu nalunngilluinnarpaa, taqqavanimi politiit pinerluttunik akiuinerminni piitsoqarfimmiut 1000-t ukiut toquttarpaat.
Inuit pisinnaatitaaffiinik suliniaqatigiiffiit sakkulersorluni akiuunneq isornartoqartippaat. Inuit ajornartorsiutaat sakkulersorluni aaqqinniarneqarsinnaanngitsutut nalileramikkik.
Brasiliamili præsidentip tullersortaata sakkulersorluni akiuunneq illersorlugu oqarpoq sakkutuut sakkut tillinneqarsimasut tiguniarlugit tillinniarnermilu akisussaasut paarnarunniaramikkit taamaatut akiuuttut.
