Rigsombudsmandi: Nutserinissaq pingaaruteqarluinnarpoq

Januar 2008 aallarnerfigalugu Nunatsinni ombudsmandip akisussaaffigilerpaa  Danmarkimi ministerit nalunaarusiaasa folketingillu inatsisiliaasalu kalaallisuumut nutsernissaat.

Taamaasiortoqarpoq inatsisit oqaasertaasa kalaallisut malinnaaffigineqarnissaat qulakkeerniarlugu. Akerlerpiaanilli pisoqarsimavoq. Nutsigaq ataasinnguarluunniit rigsombudsmandip nittartagaani takuneqarsinnaanngilaq.

Maanna rigsombudsmandip suliassaq tamanna atorfimmi siulerisaminit kingornussimavaa.

- Apriiliip aallaqqaataani sulilerpunga, pisimasullu misissorakkit takusinnaavara, sulisussaaleqineq teknikkikkullu pissutsit ajornartorsiutaasimasut. Pisimasut iliuuseqarfigisinnaanngilakka, nalunngiinnarparali suliassaq siunissami pingaartissaqigipput, Mikaela Engell taama oqarpoq.

Mikaella Engellip naammattumik ilisimasaqarfigingilai suliassat qanoq annertutigisut, oqarporli, inatsisit 2008-meersut 2009-meersulu nutserneqareersimasut 2010-meersullu ilaat nutserneqareersut. Kisianni inatsisit nutserneri nittartakkami suli takussaanngillat.

- Inatsisit nutserneqareersimasut naalagaaffiup sinniisoqarfiata nittartagaatigut saqqummersinneqassasut pilersaarutaavoq. Kisianni teknikkikkut akornuteqarnikkut taamaliorsinnaasimanngilagut. Piareeqqangaluarput saqqummersineqariaannaallutik, teknikkimilli peqquteqartumik suli iluatsinngilaq. Soorunami pimoorullugu suliaraarput, pingaarnersiukkanullu ilaavoq, siunertaraarpullu ukiamut saqqumeriiissasut, Mikaela Engell oqarpoq.

Taassuma erseqqissarpaa, pissutsit tamaannerat soorunami akuerineqarsinnaanngitsoq, taamaammallu kinguuaattoorutit naammassiniarlugit naalagaaffiup sinniisoqarfia ulapippoq.

- Suliaq ingerlanneqarpoq, aamma nutserisussanik naammattunik pissarsiniarpugut, suliassat naammassineqarniassammata. Pissutsimmi taamannerat kialuunniit iluarisinnaanngilaa, Mikaela Engell oqarpoq.

Naalagaaffiup sinniisaata erseqqissarpaa inatsisit nutserneqareersut sulili nittartakkamut ikkunnneqartut piniarneqarsinnaasut.