Rigsombudeqarfiup aaliangersinnaanngilaa meeraq sumut nuussanersoq

Meeqqap qulinik qaammatillip meerarsiartaarineqarnissaanut Rigsombudeqarfiup itigartitsinera aallaavigalugu, Qeqqata Kommuniata angajoqqaavimminut angerlartinneqarnissaa aalajangerpaa. Rigsombudeqarfimmili allaffimmi pisortap, Annette Scheelip oqaatigaa Namminersornerullutik Oqartussani pisortat tamanna aalajangigassarigaat.
Assi © : KNR
Allattoq Mads Lynge
marsip 10-at 2009 17:10

- Naamik, uagut aalajangiisinnaanngilagut, meerarsiartaarnissanut tunngasut Namminersornerullutik Oqartussat pisortaqarfiisa malittarisassatik naapertorlugit aalajangiiffigineqartarmata, Annette Scheel oqarpoq.

Tallimanngormat radioaviisimi oqaatigaarput, meeqqap meerarsiartaarineqarnissaa Rigsombudeqarfimmit akuerineqarsinnaanngimmat namminneq tamanna naalaannarsimallugu.

Annette Scheelili namminneq qanoq pisinnaatitaaffeqarnerlutik imatut oqarpoq:

- Meerarsiartaartoqassatillugu Namminersornerullutik Oqartussat isumasioqqissaariarlugit, anaanaasorlu aatsaat akuersaarpat meerarsiartaartitsinissaq akuerisarparput. Qaqutigorujussuaq anaanaasup akuerinngisaanik meerarsiartaartoqartarpoq.

Maniitsumili meerarsiartaarniartut qinnuteqarneranniit qaammatit qulingiluat qaangiummata aatsaat aalajangiisinnaasimaneq naammaginartutut isigineraa, Annette Scheel aperaarput.

Piffissaq sivisoorujussuaq misissuinernut atortarparput, Anette Scheel oqarpoq. Angajoqqaarsianngorniartut assigiinngitsutigut misissorneqartussaapput, tassa inunnik isumaginnitoqarfimmiit pulaarneqarlutik allaatigullu nalilerneqarlutik. Soorunami meeqqap toqqissisimarpasinnera pingaaruteqartupilussuuvoq, angajoqqaarsiangorniartullu iluamik paaqqinninnissaminnut periarfissaqartariaqarput. Angajoqqaarsianngorniartut aningaasatigut piginnaasaat misissorneqartarput, soorunalumi pinerlussimanernut pillagaasimanernullu allagartat tamarmik qulaajarneqartarlutik. Taakkua saniatigut sumiiffinni assigiingitsuni Inunnik Isumaginninnermut Ataatsimiititaliat isumasioqatigereerlugit, innersuussutaat naapertorlugit aalajangiikkajunnerusarpugut, kiisalu meeqqap angajoqqaavi akuersiteqqaartarlutigit. Soorunami aamma ataataasoq akuersitinneqartarpoq, arlalitsigummi aamma ataatassarsiuussineq suli naammasineqarsimaneq ajorpoq. Ilaatigut allaat ukioq sinnerlugu meerarsiartaarniarneq suliarineqartarpoq. Sunami tamarmi maleruagassat inatsisillu naapertorlugit ingerlanneqartussaasarami. Aatsaallu tamakkua tamarmik inissikkaangata aalajangiisinnaalertarpugut, Rigsombudeqarfimmi allaffimmi pisortaq, Annette Scheel oqarpoq.