Rigsombudeqarfik nutserinermi kinguaattoorpoq
Ukiunimi pingasuni affarmilu inatsisiliat qallunaatuumiit kalaallisuumut nutsigassat kinguaattoorsimaneri maani KNR-imi aasaq kingulleq saqqummiuppavut, uffa inatsisit atuutilereeraluartut.
Taamani Rigsombudsmandip oqaaseqarnera naapertorlugu nutsigassat ukiap ingerlanerani naammassineqassasut oqaatigineqaraluarpoq, paasisavulli naapertorlugit inatsisiliat assigiinngitsut 40-t missaaniittut suli nutserneqarsimanngillat.
Pisoq 2008-mili aallartippoq. Taamanimi Folketingimi ministeriniillu inatsisiliat nalunaarusiallu nunatsinni aamma atuuttut Nunatsinni Rigsombudsmandeqarfiup nutsertalerpai. Arlaatigulli ajutoortoqarsimammat inatsisiliaq ataasiinnarluunniit nutserneqarsimanngimmat pissutsit tamakku Rigsombuddemut aasaq kingulleq saqqummiuppavut.
- Ajornartorsiut pillugu paasitinneqarniariarluta ukkatarilerparput, nutserisullu avataaneersut attartorneqarnissaat siunertaralugu immikkut aningaasaliissutinik pissarsiniarlut ilungersorsimalluta, ilungersuutivullumi iluaqutaasimammata malinnaaleriartuinnavippugut. Tassa ukiup massuma naalernerani malinnaallualersimanissarput neriuutigaarput, inatsisimmi nalunaarusiallu nutaat pillugit atuagassiami Lovtidendemi saqqummiunneqaraangata kalaallisut nutserneqarneqalereerneri naatsorsuutigineqartalerniassammat, Nunatsinni Rigsombudsmandi, Mikaela Engell taama oqarpoq, nutsigassalli amerlanersui suliassarujussuunerilu tupaallaatigisimanerarlugit.
- Maanna suliniutivut aalluppavut, ilami suliassat ukkitarilluarpavut sapinngisarpullu tamaat ulappulluta, nutsigassarli qaqugorpiaqqissaaq naammassissanersoq tamatigut oqaatigineqarsinnaaneq ajorpoq, taamaammallu neriuutigisaraluannut naleqqiullugu nutsigassat sivisunnaarsimavakka, Rigsombudsmand Mikaela Engell taama oqarpoq, pissutsillu naammaginanngitsuunerarlugit.
- Suliassarpassuilli ingerlanneqarluarneqarneri iluarusuutigalugu oqaatigerusuppara. Ilami kinguaattoorujussuarnerit saniatigut suliassat allat ingerlatissallugit pisussaatitaagatta nutserisuvut ulappussimaqaat, tamatumalu saniatigut sulisinnaasut allat avataaneersut atortariaqarsimallutigit. Mikaela Engell taama oqarpoq.
Nutserisut Rigsombuddep avataaneersunut aningaasat atugassat 100.000 koruunit Statsministeriaqarfiup immikkut aningaasaliissutigisimagaluarpai. Mikaela Engell-illi oqaaseqarnera naapertorlugu nutsigassanik kinguaattoornerit ilimagisamit amerlanerusimaqimmata allatigut aningaasanik pissarsiniartariaqarsimanerarput.
Inatsisit suli nutserneqarsimanngitsut amerlanersaat 2010-eersuupput 2011-meersuullutillu. Inatsisit nalunaarutillu nutserneqareersut Rigsombuddep nittartagaani www.stm.dk<http://www.stm.dk/>.
