Rigshospitalip nunat avannarlerneersut ullorsiortippai

Qeqqussat ammassaallu panertut, sukkulaatit lakridsinik immikkat, tassa Rigshospitali nunat avannarliit pillugit ullorsiualaartitsimmat tamulugassat nunat avannarlerneersunik sassaalliussaasa ilaat. Taamatut Namminersorlutik oqartussat Rigshospitalillu uninngasut nunata avannarlerneersunut aaqqissuussinerat suleqatigiinnerisigut piviusunngortinneqarpoq.
Allattoq Knud Reimer
apriilip 16-at 2012 13:48

Rigshospitali nunat avannarliit pillugit ulluni pingasuni samminninnera savalimmiormiup guitarertartup Stanley Samuelsenip appisimaarneratigut aallarnerneqarpoq.

Taamatut aaqqissuussineq pingajussaanik ukioq manna ingerlanneqarpoq, ukiorlu manna Nunarput kisimi sammineqaannarani naalagaaffeqatigiit nunat pingasut tamatumuuna qulequtsiunneqarlutik aaqqissuussisoqarpoq.

Hanne Abild Meyer, Rigshospitalimi aaqqissuussinermi nunarput pillugu sammisaqartoq ima unnersiorpoq:

- Savalimmiormiut kalaallillu peqqinnissaqarfiisa napparsimasuutaanik uagutsinnut nassiussuisarneri tulluusimaarutigaarput, taamaammat ullut makku atorlugit tamanna nalliuttorsiutiginiarparput, Hanne Abild Meyer oqarpoq.

Kalaallillumi Rigshospitalimi uninngasut nunartik pillugu sammisaqartoqaraangat nuannaarutigisaraat Rigshospitalimi nutserisuni qullersap Else Danielsenip ima oqaluttuaraa:

- Rigshospitalip taamatut aaqqissuussisarnera pingaartorujussuuvoq. Aamma taamatut pisoqaraangat peqqissartut nuannaarnerulerlutillu qiimmassaatigisarpaat.

Tamulugassat akornanni Kamilla Sakæussen Tasiilameersoq naapikatsigu aaqqissussineq qanoringineraa aperigatsinni  akivoq:

- Nuannarivara. Ammassattorlungalu iveerartorpunga, ammassaallu mamaraluaannartillugit, ila amerlanerusuni ammassattorsinnaagaluarpugut, Rigshospitalip Kalaallit Nunaat sammimmagu qujanaqaaq nuannerlunilu.

Napparsimasut nunat avannarlerneersut akornanni kalaallit amerlanersaajuarput, tassalu 2010-mi kalaallit 1000-t Rigshospitalimi uninngasuutigineqarsimallutik.

Rigshospitalimi aaqqissuussineq pingasunngornerup tungaanut ingerlassaaq, ilaatigullu erinarsoqatigiit MIK, savalimmiormiut kaavillutik qittanneri, oqaluasaarnerit, nuersaarujuujutigaluni kaffisorujoorneq, kiisalu kaffisuunnerit naliginnaasut ingerlanneqassallutik.