Rice kangia-qiterlermut tikereerpoq

Ukiup ataatsip ingerlanerani susoqanngereersorlu USA-p Kangiani Qiterlermi eqqisseqatigiittoqarnissaa anguniarnialerpaa. Maanna malunnarpoq eqqisseqatigiittoqarnissaanik pilersaarutitoqaq taamaatiinnarneqassasoq.

Qaammatip tulliani Israelimiut Palæstinamiullu USA-p nunanut allanut ministeria, Condoleezza Rice peqatigalugu ataatsimiissapput.

- Sapaatip akunnerini tulliuttuni naalagaaffiit akornanni pisortatigoortumik oqaloqatigiinneq ulapputigineqassaaq, Rice oqarpoq.

Tassami Israelimiut Palæstinamiullu ataatsimeeqatiginnginnerini Kangianik Qiterlermik soqutigisaqaqatigiit iliuusissanik pilersaarusioqatigeqqaartussaavai. Taakkua tassaapput USA, EU, Rusland aamma FN. Eqqisseqatigiittoqarnissaanik pilersaarutitoqqap taamaatiinnarneqarnissaa ilimagineqarpoq. Kisianni eqqisseqatigiinnissamik isumaqatigiissusiornissamut periarfissat qanoq ippat?

Maannakkut ajornartorsiutaavoq Palæstinamiut præsidentiata, Mahmoud Abbas-ip Palæstinami naalakkersuisut aqussinnaanngimmagit. Tassami Hamas-ikkunnut ataatsimoortumik naalakkersuisoqatigiinnik pilersitsinissamik isumaqatigiissuteqaqqaartariaqarami taakkualu Israelimut isumaqatigiinniarnissaq akuerisinnaasariaqassavaat. Aamma Israelimiut qullersaminnik ajornartorsiuteqarput, tassami Israelimiut illersornissamut qullersaat tunuaqqammerpoq Israelimiullu amerlasuut ilimagaat illersornissamut ministeri aamma ministeriuneq erniinnaq tunuarumaartut.

Taamaattumik isumaqatigiinniarnerit aatsaat aallartissinnaalissapput illuatungeriinni naalakkersuinikkut oqartussat aaqqinneqareerpata.