Ria Hornum: Akisussaaffimmik kivitseqataagit

Kræftimik nappaateqartunut aningaasat katersorneqartut atorneqarnissaat siuneqartarineqarpoq.  

- Legatinik pisartut aningaasanik 3000 koruuninik pissarsisarput. Ukiumut inuit 150-it kræftilersimasarput, taava taakkunani 128-iinnaat legatinik pinikuupput. Amerlanerusut  legatimik pisalernissaannik siunertaqartillugu katersuiniarpugut, katersuiniarnermi aaqqissueqataasoq Ria Hornum oqarpoq.

Neriuffik ukiumoortumik Kalaallit Nunaanni najugaqartunut kræftimik nappaateqartunut katersuiniartarput.
Aningaasat 600.000 koruunit missaat siorna 2013-imi katersorneqarsimapput. Ukiormannalu neriuutigaat suli amerlanerusunik katersuinissartik.

- Soorunami neriuuteqartorujussuuvugut amerlanerpaanik katersisinnaassalluta. Oqarsinnaanngikkallarpunga qasserpiaat neriuutiginerigut. Neriuutigaarput innuttaasut tapersersuinermikkut tunisilluassasut, Ria Hornum oqarpoq.

Nappaammik kræftimik eqqugaasut tapersersorneqassagunik inuiaqatigiit akisussaaffimmik kivitseqatigiinnissaat Ria Hornumip pingaartutut isigaa.

- Inuiaqatigiit iluanni kræftertartut arlalissuugamik, taamaammat eqqugaasut amerlasuujusarput. Pingaaruteqartorujussuuvoq inuiaqatigiit tamarmik peqataallutik, akuullutik akisussaaffimmik kivitseqataanissaat, katersuiniarnermi aaqqissueqataasoq Ria Hornum oqarpoq.

Tapiiniaruma suut eqqarsaatigissavakka?

Aningaasanik katersuiniarnermut tapiissagaanni suut eqqarsaatigisariaanersut ima Ria Hornumip eqqaavai:

- Tassa eqqarsaatigissavat kræftertut tapersersussagakkit. Eqqugaasut misigissutsikkut eqqugaasaqaat. Kræftimik eqqugaagaanni soorunami nalunngilarput tamatta artornartorujussuusoq nuanniitsuullunilu nalunartartoq. Inuit taamatut inissisimasut misigissutsinik assigiinngitsorpassuarnik eqqorneqartarput, Ria Hornum naggasiivoq.

Katersuiniarneq aliikkusersuinertalik qulequtaqartoq ”Kræfti Unitsilli - tamatta eqqortarpaatigut”  toqqaannartumik  KNR-TV-kkut arfininngorpat 1. marts nalunaaqutaq 20.00-23-00 aallakaatinneqassaaq.

Juaaka Band, Qissiat, aamma NAIP-imi qilaatersortartut aliikkusersuissapput. Aamma erinarsoqatigiit tunumeersut meeqqat erinarsuutaannik atuissapput, kiisalu isiginnaartartut periarfissaqarput
makitsinermi eqqugassat annertuut eqqorneqarnissaannut.