RG ualimut raajat akinik neqerooruteqassaaq

Raajat akii pillugit isumaqatigiinniarnerit ippassaq isasoorput.

Apeqqutaalerporlu Royal Greenlandi sinerissap qanittuaneersunit raajat akiinik qanoq neqerooruteqarumaarnersoq.

Royal Greenlandip pisortaata Henrik Lethip ilisimatitsissutigaa akitut neqeroorutiginiakkatik aatsaat ualinerani avammut tusarliunniaritik.

Naatsorsuutigineqarsinnaassagunarporli Royal Greenlandip KNAPK-llu isumaqatigiinniarnerat ulluni arlalinni isumaqatigiissutigineqarneq ajulersumik ingerlasinnaasimappat taava raajat akiinik neqeroorutaasussaq aalisartuniit qujarunneqarnavianngitsoq.

KNAPK-mi pisortap John Biilmannip akitut neqeroorutaasussaq pillugu oqaaseqarumanngilaq.

Upernaaq raajat akii isumaqatigiinngissutaammata KNAPK-p tunitsiviit arlallit matuai. Taamalu KNAPK-mit piumasarineqarluni raajat akiinik illuatungeriit isumaqatigiissinnaannginnerat politikkikkut akuliuffigineqartariaqartoq, - taamani raajanik tuniseqqusiunnaarneq sapaatip-akunnerini marlunni ingerlavoq.

Tamatuma kingorna aalisartut aki piumasartik anguaat, illuatungaatigulli Royal Greenlandip tunitsiviit arlallit matullugit.