RG-p suliffissua mingutsitsisoq
Ilulissat umiarsualiviat ukiorpassuarmi qalerallit perlukuinik mingutsinneqartartoq tippattaqisorlu kiisalu piginnittuata iliuuseqarfiginialerpaa.
Royal Greenlandip Ilulissani qaleralinnik tunisassiornini ullumimiit unitsikkallaritsik, pisortap Henrik Lethip oqaatigaa.
Taassumalu kinguneranik avatangiisinut pisortaqarfik ataatsimeeqatigilersaarlugu Ilulissani tunisassiorfiup perlukunik eqqaasarneq pillugu sumik qanorlu piumasaqarnersut paaserusullugu.
Ilulissat umiarsualiviat ukiuni arlaqaleqisuni mingoqartaqalunilu tipeqartaqaaq, Iluliarmiullu tamanna naammagittaalliutigisaraluarlugu suliffissuarmik piginnittup Royal Greenlandip iliuuseqarfigisanngilaa.
Royal Greenlandip suliffissuata eqqakkanik aqqutaa, ruujorersuaq putusarsimavoq, qalerallillu perlukuinik umiarsualivik tujorminarsitilersarpaa tippattaqalunilu.
Iluliarmiut umiatsiatik ingammik aasakkut pujaqalersarput, akornutaasaqisumik
Naammagittaalliortartullu paasillugit avatangiisinut naalakkersuisoq Jens Napaattooq oqarpoq Royal Greenlandip sianiginngitsuusaarnera naammalersoq, Ilulissallu umiarsualiviani mingutsitsineq iliuuseqarfigineqartariaqalersoq.
Royal Greenlandip avatangiisinut akuersissutaa aappaagu atorunnaassaaq, Royal Greenlandilu iliuuseqarusunngippat 2007-mi akuersissummik pinavianngitsoq naalakkersuisoq oqarpoq.
