RG-p kilisaataani angut aalisartoq Islandimukaanneqartoq
Kilisaatip Tunup Islandillu akornanni aalisarnerata nalaani, Islandimi alapernaarsuisut nakkutilliisoqarfiat kilisaammiit attavigineqarpoq.
Issittumi Sakkutooqarfimmi, pigaartut pisortaat, Jesper Lyngholm KNR-imut taama ilisimatitsivoq.
Kilisaammi inuttap, 55-inik ukiullip, timimigut saamerlikkut malugisaarunnerata kingorna, kilisaammi aquttup oqartussat ilisimatillugit attaveqarfigai.
AAMMA ATUARUK Pisuttut pingasut Issittumi Sakkutooqarfimmit annaanneqartariaqartut
Attaveqartoqareersorlu pinasuartumik pitsaanerusumillu ikiuigasuartoqarnissaanut Islandimit ikiorsiisoqassasoq, Issittumi Sakkutooqarfiup nalilerpaa.
Islandimi sinerissami alapernaarsuisut naliliinermi isumaqataallutik, Reykjavikimiit helikopterimik akunnerit marluk ingerlaareerlutik kilisaammut Masilimmut anngupput.
Angut aaneqartoq ajunngitsoq
Islandimi sinerissami alapernaarsuisut KNR-imut ilisimatitsissutigaat, angut helikopterimik aaneqartoq - Reykjavikimut tallimanngornermi januaarip 17-ani, Islandip nalunaaqutaa naapertorlugu nalunaaqutaq, aqqanermut qiteqquttoq napparsimmavimmut apuunneqarsimasoq.
Royal Greenlandimi, attaveqaqatigiinnermut ingerlatsisoq, Inga Dora Markussen KNR-imut oqarpoq, kilissaammi inuttaasoq Islandimi napparsimmavimmi misissugaritilluareerluni ajunngitsoq paasineqartoq, maannalu nunatsinnut apuussimalereersoq.
AAMMA ATUARUK Issittumi Sakkutooqarfik kilisaammik ikiuisoq
Videomi takuneqarsinnaavoq - kilisaatip uninngaffiani sila taarlunilu ersernerluttoq. Islandimi alapernaarsuisut naapertorlugit - alapernaarsuisut helikopterimiit piareersartut videomi takuneqarsinnaavoq.
