RG oqaluuserineqassanersoq Inatsisartut aalajangissavaat

Royal Greenland inatsisartut maanna ataatsimiinneranni immikkut oqaluuserisassanngortinneqassanersoq Inatsisartut ullumi marlunngornermi aalajangiiffigissagaat, Inatsisartut siulitttaasoqarfiat ullumi aalajangerpoq.

Royal  Greenlandimut atatillugu aaqqiagiinngissutit naalakkersuisunit inatsisartunut nassuiaatigineqarnissaannik Atassutip Demokraatillu siunnersuuteqarnerat tunngavigalugu inatsisartut siulittaasoqarfiata Inatsisartut maanna inappai aqagu marlunngornermi isummerfigissagaat.

Siulittaasoqarfiup aamma siunnersuutigaa Royal Greenlandip nassuiaateqarfiginissaa pissappat oqaluuserinninneq siulleq tullialu periissapput  sisamanngorpat oktoberip ulluisa 14-anni, tassa  aalisarnerup nutaamik aaqqissuussaanissaanik naalakkersuisut nassuiaataata ulloq taannarpiaq oqaluuserinissaa sioqqullugu.

Siulittaasoqarfiup inatsisartunut taama aperinera ataatsimiinnerit ingerlasarnissaannut malittarisassamik paragraf 41-mik atuineruvoq, tassani allassimammat oqaluuserisassanngorteriikkat piffissaagallartillugulu taama pisat saniatigut immikkorluinnaq pissutissaqaraanni oqaluuserisassanngortitsineq pisinnaasoq.

Taamalu inatsisartut aqagu ataatsimiinnerup allartinnerani isummerfigissavaat Royal Greenlandimut tunngasoq sisamanngornermit oqaluuserineqalissanersoq imaluunniit oqaluuserineqassannginnersoq.

Siumup IA-llu inatsisartuni ilaasortaasa oqaluuserisassanngortitaq qanoq isummerfigissanerlugu tamassa isumaliutigaat.

Taamaalilluni aqagu oqallinnissaq akerleriiffiusussaagunavippoq piffissami qaangiuttumi saqqummertartut isoqanngitsutut ittut arlallit qaqilinngitsuugassaagunaratik.

Kattusseqatigiinnit Anthon Frederiksen ualigaa aamma oqarpoq pineqartut oqaluuseririnnissaannik siulittaasoqarfiup siunnersuuteqarnera pissusissamisoortoq.