RG nassuiaavoq
Ilulissani qaleralinnik tunisassiorneq annertusineqarpat Qasigiannguani qalerillerinerup annikillisinneqarnissaa Qasigiannguarmiut ernummatigaat. Ilulissani qalerallerinerup annertusineqarnissaa Qasigiannguanut qanoq kinguneqassava? Apeqqummut tassunga tunngatillugu paasissutissat Royal Greenlandip pilersaarutaanik imallit radioavisimi pissarsiaraagut. Else Olsvig paasissutissiissaaq.
Qalerallit nerpiinik tisaanik piumasaqarneq annertusiartormat Ilulissani qaleralinnik tunisassiorneq juunip 25-ianiit annertusineqasssoq tassungalu ilutigitillugu raajanik tunisassiorneq annikillisinneqassasoq, Royal Greenlandip pisortaanera Paaviaaraq Heilmann Ilulissat kommuneanut, Ilulissani KNAPP-mut SIP-mut, Kanukokamut Inuussutissarsiornermut Aalisarnermullu pisortaqarfinnut maajip qulingiluaanni allagaqarpoq. Qasigiannguit kommuneat allakkanik nassinneqarsimanngilaq.
Paaviaaraq Heilmann allappoq Ilulissani qalerallerivimmi upernaaq manna aalisakkanut minnernut tisaammik ikkussisoqassasoq, qalerallerivimmilu sulisut nikittaattut ataatsimik ilaneqassasut. Ilulissani raajanik tunisassiornermi killiliinerup kingunerisaanik raajarniat ilaat pingasut imaluunniit sisamat missaaniissanniittut Royal Greenlandip raajaleriffiinut allanut marlunnut tulaassisarnissamik neqeroorfigineqassapput.
Ilulissani qaleralinnik tunisassiornerup iluatsilluarnissaa aammalu Sisimiunut Paamiunullu raajanik tulaassisarnikkut taakkunani tunisassiornerit ingerlaavarnerulernissaat qilanaarigitsik Paaviaaraq Heilmann allappoq.
Royal Greenland Qasigiannguit kommuneannut maajip qaammataani allappoq Ilulissani qaleralinnut tisaammik ikkussinerup qaleraleqassutsimut sunniuteqarnerlunnissaa naatsorsuutigineqanngitsoq aammalu Ilulissani tisaatip atorluarsinnaanini takutereerpagu Qasigiannguani tisaammik ikkusissoqarumaartoq. Aamma tulaassassat pillugit isumaqatigiissut inisseriarpat Qasigiannguani qaleralleriviup ukiumut aalaakkaasumik tunisassiaqartalernissaa naatsorsuutigineqartoq Royal Greenland allappoq.
