RG namminersortunngorsarneqanngikkallassaaq
Suliffeqarfissuaq 2009-mi 196 millionit koruuninik amigartooruteqarpoq. Suliffeqarfik amigartoortarunnaarluni sinneqartoortalerpat, namminersortunut tunineqarsinnaanera aatsaat nalilersorneqarsinnaasoq, pisortaq isumaqarpoq.
- Piffissaq ungasinnerusoq isigalugu nalilersornissaa soqutiginarsinnaavoq, maannakkulli taamatut aalajangiinissaq kukkuneruvoq, Royal Greenlandip pisortaa Flemming Knudsen taama oqarpoq.
Royal Greenland namminersortunngortinneqassanersoq, aalisarnermik soqutigisallit qaammatini kingullerni isummersorfigisarpaat.
Sulisitsisut Peqatigiiffiata piffissami sivitsortumi - aamma qanittukkut - suliffeqarfissuup tamakkerluni ilaannakortumilluunniit namminersortunut tunineqarnissaa illersorlugu nalunaaruteqartarpoq.
Taamaattorli Nunatsinni kattuffiit tamatumunnga assigiinngitsunik isumaqarput.
KNAPK isumaqarpoq namminersortunngortitsinikkut aalisakkat tunineranni akit qaffariassasut. SIK-miilli tunisassiorfiit tapiiffigineqaratik ukioq kaajallallugu ingerlasinnaanngitsut matuneqarnissaat ernummatigineqarpoq, tamannami suliffissaaleqisut amerleriarnerannik kinguneqaannassammat.
Oqallinnermut tamatumunnga Royal Greenland manna tikillugu akuliunnaveersaarsimavoq. Tamanna pillugu Flemming Knudsen ima oqarpoq:
- Royal Greenlandip imminut akilersinnaasunngorteqqaarneqarnissaa isumaqarpugut pingaarutilerujussuusoq, taamaalilluni suliffeqarfik nukittooq pilersinneqarniassammat. Aatsaallu taamaaliortoqareerpat taamanikkussamut kikkut piginnittuussanersut oqaluuserineqarsinnaavoq, Flemming Knudsen oqarpoq.
Taassuma suliffeqarfissuup tamakkiisumik ilaannakuusumilluunniit namminersortunut tunineqarneratigut aalisakkat akiisa qaffannissaat ilimaginngilaa. Tamatuma akerlianik namminersortunngorsaanikkut inuiaqatigiinni kalaallini inooqatigiinnikkut ajornartorsiutinik pilersoqassasoq, suliffeqarfissuup pisortaa isumaqarpoq.
- Namminersortunngorsaanerup kinguneranik tunisassiorfiit arlallit matuneqarnissaat naatsorsuutigineqarsinnaavoq, tassami aalisariutini allamiluunniit tunisassiorneq akikinnerussammat. Tamatumali kinguneranik suliffissaaleqisut amerleriassapput ullumikkullu tunitsivigineqartartut arlalissuit matuneqartariaqassallutik, Flemming Knudsen oqarpoq.