RG: Misissuisimaneq ilaannakorpoq
KNAPK-p Qallunaat Nunaanni misissueqqissaartarfiit ilaat Gemba Seafood Consulting misissuitsinissaanik suliakkerpaa. Nalunaarusiaallu ippassaq saqqummersinneqarmat ersersinneqarpoq Kalaallit Nunaanni aalisakkat avammut tunineqarnermikkut akigititaat nunarsuarmi akigitinneqartunut allanut sanilliullugit appasinnerujussuusut.
Aalisartut piniartullu Kattuffianni siulittaasoq Leif Fontaine oqarpoq, misissuisitsinerit taamatut ittut inuiaqatigiinnut akisoorujussuusut, inuiaqatigiilli susassarilluinnarmatigit qulaajaaneq pisariaqalivissimasoq.
Soormiuna qangali misissuisitsisoqarsimanngila?
- Eqqaamaniarneqaqqaartariaqarpoq ukiuni makkunani aalisarnermut inatsisip naleqqussarnera ilutigalugu Nunatsinni naalakkersuisunut piumasaqarsimagatta, misissuineq taamatut ittoq peqqaartariaqartoq. Iliuuseqanngimmatalu uagut nammineq iliuuseqarsimavugut, oqarpoq.
KNAPK Royal Greenlandimik aalisakkat akii pillugit ukiuni arlaqartuni isumaqatiginninniartarsimagaluarpoq, isumaqatigiinniartarnerilli annertunerusumik kinguneqarneq ajorput.
- Inuiaqatigiit aaqqissuunneqarnerat qiviarutsigu oqareernittuut Namminersorlutik Oqartussat pigisaat Royal Greenlandi, annertoorujussuarmik ulloq mannamut oqaasissaqartinneqarpoq. Uagut akit pitsaanerusut anguniarlugit piumasarisartakkavut isumaqatigiinniarnerlu ullumikkut angujuminaatsorujussuuvoq, Leif Fontaine oqarpoq.
Nalunaarusiami saqqummiunneqartut ilagaat, siorna 2010-mi raajat Kalaallit Nunaanniit Danmarkimut tunineqartut agguaqatigiissillugit kiilumut 18 koruuni 55 oorimik akeqartut, piffissami tassanerpiaq Danmark Italiamiunut raajanik nioqquteqarneranni kiilumut 60 koruuni 68 ooriusimasut.
Royal Greenlandip avammut tusagassiisartuata Siverth Amondsenip nalunaarusiaq paasinartuunerarpaa. Taamaattorli tamakkiisuunnginnerarlugu oqarluni.
Nunani allani aalisartunut sanilliussiniarnerit atorneqarsinnaanngitsut Siverth Amondsenip oqaatigaa.
- Aalisakkeriviit ingerlatsinernut aningaasartuutaat misissorneqarsimanngillat, nassuiaavoq.
- Pivakka innaallagissamut aki, imermut kissartumut aamma uuliamut akit. Taavalu aamma pingaartumik assartuinermut akit - fragtprisinik taaneqartartut - Nunatsinni atuuttut qaffasinnerujussuupput. Siverth Amondsen oqarpoq.
Erseqqissarpaa, akit nunatsinni aalisartunut pitsanngoriassappata aalisakkeriviup aningaasartuutai isiginiarneqaqqaartariaqartut.
