RG-mi sulisuusimasut pikkorissaqataanngillat

septembarip 13-at 2006 10:41

Narsami sulisartut peqatigiiffiat, SIP, sukumiisumik piareersarluareerluni, tusagassiutinut maanna saaffiginnippoq oqarluni, Royal Greenland –ip raajaleriffigisimasaani sulisuusimasut qanittukkut Neqi A/S suliffissaaleqisunik pikkorissartitsimmat peqataatinneqarsimanngitsut.

- Taama pisoqartariaqarsimavoq pikkorissartitsinissatsinnut pilersaarutit Inuussutissarsiornermi Pisortaqarfiup tunuartimmatigit, tassamigooq pisussat Neqi A/S-p Inuiliullu ingerlattussanngorsimammatigit, taama nassuiaavoq Hans Bro, Royal Greenland Academy –p ilinniartitaanermi pisortaa.

- Sapaatip-akunnerani kingullermi Neqi A/S-p Inuiliullu pikkorissartitai naammassimmata, Royal Greenland –ip raajaleriffikuani sulisimasut tallimat missaat taamaallaat peqataapput. Neqi-p nammineq sulisorisimasai pikkorissarnermi salliutinneqarput. Royal Greenland –illi sulisorisimasai 45 –it missaat suli suliffissaaleqipput. Taakkulu pikkorissartinneqarumaarnerannik neriorsorneqaraluarput, taama oqarpoq sulisut sinniisaat aammalu Narsami SIP –mi siulittaasup tullia Kristian Petrussen.

Royal Greenlands Academy –p ilinniartitaanermi pisortaa Hans Bro oqarpoq, Royal Greenland –ip sulisorisimasaasa pikkorissartinneqarnissaq pisariaqartippassuk, taava tamatuminnga qaangiiniarnissartik soqutigigitsik.