RG-mi sulisut peqqinnerusut

Pujortarunnaarlutillu saningorserit, taama Royal Greenland sulisuminut 2300-juusunut ikiuinissamut neqerooruteqarpoq.

Inooriaatsimik peqqinnartumik atugaqalernissamik aalisakkanik tunisassiorfik, sulisuminut peqqinnissamut isumaqatigiissusiorpoq. Taassuma saniaritigut sulisut misigisaqarlutillu pinnatassaqartalissapput, taama aviisi Børsen allappoq.

Aatsaat taamak peqqinnissaq anguniarlugu suliffeqarfimmik suliuneteqarluartigisoqartoq, aviisi allappoq.

Suliffeqarfiup suliniutai assigiinngitsut tallimaapput, tassaallutik: pujortarunnaarnissaq, timersornerulerneq, peqqinnarnerusunik nerisaqalernissaq, pualavallaannginnissaq inuummarinnerunissarlu.

Sulisut ullut tamaasa ullorsiutinut allattassapput, ilaatigut peqqinnarnerusumik inuulersimanertik ullorsiutini oqaluttuarisassallugu.

Sulisut pinngitsaalineqassanngitsut, Royal Greenland-ip pisortaa Keld Askær oqarpoq, namminerli kajumissuseq aallaavigalugu suliniummut peqataasoqarsinnaasoq erseqqissaatigaa.

Nammineq kajumissuseq atorneqanngippat sulisut pinngitsaalineqartutut misigilissapput, tamannalu pinaveersaartinniarneqartoq, Århusimi siunissamik ilisimatusarfimmeersoq Marianne Levinsen oqarpoq.

Royal Greenland-illi taamatut aaqqissuussiniarnera pitsaasortaqarsoraa.

- Royal Greenlandimi sulisut allanut naleqqiullutik nungullaqqajaanerusutut misigisimasarput, taamaammat suliniut pitsaasutut nalilerpara, Marianne Levinsen oqarpoq. Taassumali peqqinnissaq pillugu isumaqatigiissuteqartarnissami pisortap ilaatinneqartarnissaa eqqarsarnartoqartinnerarpaa.