RG-mi sulisut 35-it angerlartilerpaat
Tunisassiassat tulaanneqartartut ikilinera pissutaalluni Royal Greenlandip Ilulissani raajaleriffiani sulisut 35-it angerlarallartinneqartussanngorput. Raajalerinermili sulisut 70-it sulinertik ingerlatiinnassuaat.
Pisassiissutit nutaat ukiortaap kingorna aatsaat atorneqarsinnaalissapput, taamaalippat ilimanarsinnaavoq tunisassiassat tulaanneqartartut suliassaqartitsinerulernissaat.
- Sulisut tamarmik paarlagiiaatut marlutut sapaatip akunnerani ulluni tallimani suliinnarsinnaanissaannik periarfissaq misissorsimavarput. Naatsorsuinittali ersersippaat tamanna sulisunut tunisassiorfimmullu imminut akilersinnaanngitsoq, tunisassiorfimmi ingerlatsisoq Hans Lars Olsen oqarpoq.
Suliassaarukkallarnermi pikkorissartitsisinnaanermut periarfissaq qaammatinut tulliuttunut peqqumaatiginiarlugu Royal Greenland aalajangerpoq. Tassami Qeqertarsuup tunua sikussappat tunisassiassanik tulaassuineq unikaallattussaassammat.