RG-mi sulisut 100-t soraarsitaaratarsinnaapput
Royal Greenland-ip suliffeqarfiutaani Glyngøre-miittumi sulisut nikallungaqaat, aqutsisunit ilisimatinneqaramik qanittumi sulisut 100-t soraarsinneqassasut.
Kapisilinnik qaleralinnillu pujoorivik, Polen-mut nuutinneqarsinnaanera ilimagineqartoq suliffimmi aqutsisut oqarput, oqaatigineqarporlu Polen-mi aalisakkerivinni sulisut akissarsiamikkut akunnermut 125 kr.-nik danskininngarnit akikinnerusut.
- Aqutsisut taamatut nalunaaruteqarnerat ajuusaarutigeqaarput, taamatulli aalajangertoqarumaarnissaa qangali ilimagigatsigu tupaallannartinngilarput, sulisut sinniisaat Else Sørensen oqarpoq nangillunilu. – Neriupunga Royal Greenland Danmarkimi suliffissaqartitsiuarumaartoq. Aamma maani suliffeqarfiit matoorarput, taamaammat suliffissanik nutaanik pissarsiniarsinnaaneq ajornakusuussaaq. Siunissarput nalorninartorsiorfioqaaq, tamarsuattami asaasunngorsinnaanatalu angerlarsimaffinni ikiortinngorsinnaannginnatta, Else Sørensen naggasiivoq.
Royal Greenland-ip suliffeqarfiutaani Glyngøre-miittumi sulisut ullumikkut 250-iupput.
Glyngøre-mi sulisartut peqatigiiffianni 3F-mi siulittaasoq Gert Ringgaard oqarpoq, Royal Greenland-ip suliffissuani soraarsitsinerit piviusunngorpata illoqarfimmut Glyngøre-mut sunniuteqarnerlussasoq. Nassuerutigaa Polen-mi sulisartunut akissarsiakinnerungaartunut, Royal Greenland-mi Glyngøre-miittumi sulisartut unammillersinnaanngitsut.
Glyngøre-mi sulisartut peqatigiiffianni 3F-mi siulittaasoq Gert Ringgaard neriuppoq Royal Greenland-ip suliffissuaatini nunanut allanut nuussornagit Danmarkimiitiinnarneqassasut.
