RG-mi suliffiit 100-t annaaneqassapput
Sisimiut Maniitsullu avataanni saattuarniarfiit aappaagu matuneqassappata Royal Greenlandimi suliffinnik 100-t missaannik annaasaqarfiussaaq.
Pinngortitaleriffiup siunnersuinerani ippassigami naalakkersuisunut nassiunneqartumi siunnersuutigineqarpoq avataani saattuarniarfiit anginerit ukiumi ataatsimi aalisarfiggusaajunnaassasut. Avataani aalisarfinni sinneruttuni (Qeqertarsuup Tunuata avataani kiisalu Nuup Paamiullu avataanni) pisassat affaannanngorlugit imaluunniit siornatut annertuginiinnartumik aalisarfiunissaat Pinngortitaleriffiup inassutigaa. Sisimiut Maniitsullu avataanni saattuarniarfiit matuneqassappata Royal Greenlandip saattuarniutai pingasut saattuarniallu sisimiormiut marluk Sisimiuni suliffissuarmut tulaassassaarutingajassapput.
Tamanna suliffissuarmi suliffiit 40-t Royal Greenlandillu kilisaataataani suliffiit 60-it peerunnerannik kinguneqassasoq, Royal Greenlandimi pisortaanerup tullia Henrik Leth oqarpoq.
-Suliffissuarmut tulaattakkat soorunami ikileriarujussuassapput, tassami tulaanneqartartut 70 procentii nammineq aalisariutaatitta angallatillu Sisimiuneersut anginerusut tulaattarpaat. Taakku ukiup annersaani aalisarsinnaajunnaarpata soorunami suliffissuarmi suliassaarutipajaassapput, taamaattumillu sulisugut 40-t ukiup annersaani suliassaqassanngillat, Henrik Leth oqarpoq.
Saattuarniarneq Pinngortitalerffiup siunnersuinera naapertorlugu aappaagu malunnaatilimmik millisinneqassagaluartoq Royal Greenlandip suliffissuaataasa sinnerinut (Paamiuniittumut Aasianniittumullu) annerusumik sunniuteqassangatinneqanngilaq. Qeqertarsuup Tunuani sinerissap qanittuani pisassat sisamaraterummik ikilissapput, avataani affaannanngorlutik, katillugit 2000 tonsit missaaniilerlutik. Nuup Paamiullu sineriaasa qanittuanni avataannilu pisassat siorna pisassatut annertutigiinnarlutik katillugit 2300 tonsiussasut siunnersuutigineqarpoq.
Saattuartassanut inassutai naalakkersuisunut ulluni qaninnerni ilisimatitsissutitut saqqummiunneqassapput, kingornalu pisassiissutissanut siunnersuutit Aalisarnermut Siunnersuisoqatigiinni isummerfigineqareerpata naalakkersuisunut aalajangiiffigisassanngortinneqassallutik.
