RG-mi siulittaasoq: Kammalaatersornerunngilaq
Royal Greenlandip qallunaamik Mikael Thinghuusimik pisortaanertaarnissaa, kalaallisut oqaaseqartuunngimmat Nusukap assuaraa. Aamma allap, Knapk-mi siulittaasuusimasup qallunaap atorfinitsinneqarnera kammalaatersornertut nalilerumavaa.
- Kammalaatersornerunngilluaasarpoq, ajuallannarpoq kammalaatersornertut oqaluuserineqarnera, Niels de Coninck-Smith oqarpoq.
Aamma oqarpoq, nammineq marsimi siulittaasunngorami pisortaanerup Flemming Knudsenip soraarninngornissani qanillisoq oqaluttuussimagaani. Taamaammaat upernaarli inuttassarsiuisartoqatigiit headhunter-firmat arlallit saaffigisimavaat.
Inuttassarsiuisartoqatigiit Amrop-ikkut Royal Greenlandip pisortaanissaanik taamanerniilli ujarlilerput.
Amrop-ikkut inummik suliffeqarfissuarmik aqutsisutut nunanullu allanut niuernermik ilisimasalittut aammalu aningaasatigut takussutissartalimmik ingerlatsilluarnermik misilittagalimmik ujaasitinneqarput.
- Inummik Royal Greenlandip siunissami ingerlaqqinnissaanut sunniuteqaqataasumik ujarlerpugut, siulersuisut siulittaasuat oqarpoq.
Amrop-ip inuit 100-t missaanniittut misilittagaat misissorsimagaat siulittaasoq ilisimatitsivoq. Royal Greenlandimi namminneq atorfinittussap kinaaneranik aalajangeeqataasussanik aamma ataatsimiititaliorsimapput, ilaatigut sulisut sinniisaannik inuttaqartumik. Taakku inuit 15-it missaanniittut nalilersorpaat naggataagut pingasuinnanngortunik.
Soormitaavaata kalaallisut oqaasilimmik pisortartaalinngitsusi?
- Kalaaliunissaanik allatulluunniit inuiaassuseqarnissaanik uagut piumasaqaateqanngilagut. Misilittagalimmik ujarleqqusimavagut, taamaammat aamma Mikael Thinghuus-ip toqqarneqarnera eqqortuusoraarput. Eqqortuusorinngikkutsigumi atorfinitsissimassanngikkaluarparput, Niels de Conick-Smith erseqqissaavoq.
Mikael Thinghuusip kamippaliorfissuarmi Eccomi pisortatut angusarissaartitsinera toqqarneqarneranut pisooqataasimasoq aamma oqaatigaa.
Oqarputit angusarissaartitsisinnaasoq toqqarlugu. Kisianni IDdesign maanna Mikael Thinghuusip pisortatut suliffigisaa 100 millioni koruunit sinnerlugit amigartoorpoq?
- IDdesign akiitsunik suli akilersugaqartoq aamma nunarsuarmi aningaasarliornermit ukiuni kingullerni eqqugaaqqavoq, kisianni akiitsut millionerpassuarnik ikilisippai, nassuiaavoq.
Royal Greenland pisortaanertaaginnarani aamma pisortap tullia Paviâraq Heilmann aamma soraarniartoq taartissarsiortariaqassavaa, kisianni inuttassarsiuisartoqatigiit tamatumani atorneqarnissaat ilimaginagu, Niels de Coninck-Smith oqarpoq.
