RG inatsiartuni oqallisineqassanersoq isummerfigineqassaaq

Royal Greenlandimut atatillugu pisimasut inatsisartuni nassuiaatigineqassanersut inatsisartut siulittaasoqarfiata ullumi nalunaaqutaq ullo’qeqqanut ataatsimiileruni aalajangissavaa.

Atassut Demokraatillu siulittaasoqarfimmut apeqquterpassuarnik allagaqarlutik Royal Greenlandi pillugu immikkut ittumik nassuiaasoqarnissaa piumasaraat.

Demokraatit siulittaasuat Per Berthelsen radiioaviisimut arfininngormat oqarpoq, IA-meersup Aqqaluk Lyngep Royal Greenlandi pillugu erseqqissaasoqarnissaanik piumasaqarnera tunngavigalugu inatsisartut siulittaasoqarfianni oqaluuserisassanngortitsinissamut amerlanerussuteqarsinnaassallutik.

Inatsisartut siulittaasoqarfiani Siumukkormiut marlunnik ilaasortaatitaqarput, Jonathan Motzfeldt aamma Doris Jakobsen, IA-mit Aqqaluk Lynge siulittaasup tullerigaa, illuatungiliuttut Demokraatinit Per Berthelsen aamma Atassummit Finn Karlsen ilaasortarigaat.

Aqqaluk Lynge maanna erseqqissaavoq pisimasut inatsisartuni oqaluuserinissaat takorloorsimanngisaannarini, oqarluni Radioavisimut Sermitsiaq-mullu oqarnini illuatungiliuttut atornerlunniaraat. Illuatungiliuttut naalakkersuisuutitanik uparuartuinerannut namminneq IA-mit peqataaniarsimanngisaannarlutik aammaarluni oqaatigaa.

Atassutip Demokraatillu inatsisartut siulittaasoqarfiannut saaffiginnissutaat oktobarip arfineq-pingajuannik ulluligaq suli takusimanagu Aqqaluk Lynge ippassaq aamma oqarpoq.