RG Ilulissat: Suliffissaaleqisoqaraluaqisoq sulisussaqanngilavut

- Ilulissat Kommuneata oqaatigisaatut suliffissaaleqisut qanorluunniit amerlatigigaluarpata naammattunik sulisussaqanngilavut.

Ilulissani borgmesterimut, Anthon Frederiksen-imut Royal Greenland taama akissuteqarpoq. Anthon Frederiksen ippassaq Radioaviisimut oqarpoq, Ilulissani qalerallerivimmik matusineq kommunip aningaasaqarniarneranut sunniuteqarnerluttoq. Sulisummi 125-it eqqorneqarput.

Royal Greenlandimi pisortap, Henrik Leth-ip, aasaanerani matusinermut pissutaanerarpaa raajanik qaleralinnillu tunisassiornermi ullut tamaviisa sulisussaaleqisarnertik.

Henrik Leth oqarpoq, qaleralliorfiup kommune ippassaq qinnuigisimagaluaraa inunnik 45-inik suliassanut 30-nut suliartortitseqqullugu, 18-iinnaalli takkussimapput.

Pisortap ajornartorsiut tamanna nutaarsiassaannginnerarpaa. Ukiorpaaluit tamanna ajornartorsiutigisimavarput, maannalu tassa Kalaallit Nunaanni suliffeqarfiit annersaasa ilaannut ajornartorsiut kinguneqarnerlutsitsilerpoq.

- Inunnik Ilulissanut ukiuni siuliini nutsertitsilluta misilittarsimavarput, tamannali akisusaqaaq, aammalumi illoqarfinni allani tamannarpiaq ajornartorsiutaasarpoq, Henrik Leth nalunaarpoq.