RG aalisakkerisussaaleqivoq – aalisagarpassuit suliarineqanngitsut aallarunneqartarput
Namminersorlutik Oqartussat Qaasuitsup Kommunialu ataatsimoorlutik qanittukkut nalunaaruteqarput kommunimi suliffissaaleqineq immikkut iliuuseqarfigineqassasoq. Kommunimi suliffissaaleqisut katillutik maajimi 964-upput. Qasigiannguani suliffissaaleqisut 192-llutik Uummannami 115-usut.
Illoqarfinni taaneqartuni suliffissaaleqisoqaraluaqisoq taamaattoq aalisakkerivii katillutik 55-nik aalisakkerisinnaasunik amigaateqarput. Qalerallit Ilulissat eqqaanni pisarineqartut Qasiginngualiaanneqartarput, tassani suliarineqartarlutik.
Qasigiannguani qaleralinnik filelerisinnaasut siorna amigarmata, qalerallit 600 tonsit Royal Greenlandip Ilulissani suliffissuata qerititsivianut inissiinnarneqartariaqarsimapput. Ilulissani pisarineqartut 20 procentii suliarineqaratik inissiinnartariaqarlutik, nunanut allanut kingorna aallarunneqarlutik.
Taakku Qasigiannguani sulisunit 16-nik ukioq kaajallallugu suliarineqarsinnaagaluarlutik. Qasigiannguani qalerallit ulloq unnuarlu 25 tonsit suliarineqartarput.
Royal Greenlandip Uummannami suliffissuata qalerallit 1750 tonsit suliarineqanngitsut avammut siorna aallarutittariaqarsimavai. Taakku ukioq ilivitsoq 40-nik suliarineqarsinnaagaluarlutik, taamalu amerlatigisut sulisimasuuppata katillugit 10 million koruunit aningaasarsissutaasimassagaluarput.
Erseqqissaatigineqassaaq qalerallit ummannarmiut aalisartuisa pisaasa affaat sinnerujussuarlugit avammut aallarunneqartariaqarsimammata. Royal Greenlandip Uummannami aalisakkeriviata sulisuisa qalerallit ulloq unnuarlu 40 tonsit tunisassiarisinnaasarpaat.
Royal Greenlandimi tunisassiornermi aqutsinermi ingerlatsisup Sten Sørensenip oqarnera naapertorlugu qalerallit Kinamut niaquerlugit paperuerlugillu tunineqartarput, piumasaat naapertorlugit taama tunineqartarlutik. Erseqqissarpaali qalerallit ilarpassui Kinami suliarineqariarlutik Europamut aamma tunineqartarmata.
Naalakkersuisut siulittaasuat Kuupik Kleist, Inuussutissarsiornermut naalakkersuisoq Ove Karl Berthelsen borgmesterilu Jess Svane ataatsimoorlutik nalunaaruteqarnerminni erseqqissarpaat suliffissatsiarsuarnik annaasoqartartartoq, qaleralinnik suliarineqarsimanngitsunut nunanut allanut tunisisoqaraangat.
Erseqqissaappullu illoqarfinnit nunaqarfinniillu sulisussarsiornermi suliffissaqarfiusunut nuunnissamut aningaasaateqarfiup periarfissarititai naapertorlugit piaartumik iliuuseqartoqartariaqartoq.
Royal Greenland Qaasuitsup Kommunia suleqatigalugu suliffissaqarfiusunut nuunnissamut aningaasaateqarfikkut 10-nik qanittukkut sulisussarsisimavoq, qaleralinnik tunisaqarfiunerpaaffiani sulisinnaasunik sulisussarsilluni.
