RG: Aalisakkat tuneriaannanngorlugit suliarineqartarnerat aallartereerpoq
KNAPK-ip siulittaasuata Leif Fontaine-ip politikerit isumaqatigai piumasaralugu, aalisakkat qaleruallillu nunatsinni annerusumik suliarineqartassasut.
Aalisakkat nunatsinni tunisassiat nunatsinnut iluanaarutaanerussasut, Royal Greenland-imit oqaatigineqarpoq, siunnersuutigineqartorlu paasisinnaallugu. Aalisakkat pisiarineqariaanngorlugit suliarineqartarnerat Royal Greenland-imit aallartinneqareerpoq.
- Kinguppaat poortorneqartarnerat maanna Aalborg-imi suliarineqartarnerat Ilulissanut Sisimiunullu nuunneqarnissaannut piareersartoqarpoq, Kalaallit Nunaannilu suliarineqarsinnaasut nuunneqarnissaat suliniutigaarput periarfissaasut naapertorlugit, Royal Greenland-imi tunisassiornermut pisortaq Lars Nielsen oqarpoq.
Aalisakkanik suliffissuit pioreersut piorsarneqarnissaat kissaatigineqarpoq aalisakkat avammut tunineqartinnagit suliarineqartarfissaannik, taamaaliornikkut aningaasatigut isertitat amerlanerussapput, inatsisartunut qinersinissaq sioqqullugu qinigassanngortittut arlaqartut taama siunnersuuteqarput.
- Fabrikkit nutartertigit, ineriikkanillu avammut niuerluta, nunarsuarmigooq uumasunik pigissaarnersaavugut, sooq atorluanngilagut?, Partii Inuit sinnerlugit inatsisartunut qinigassanngortittoq Lars Mathæussen Sisimiuni qineqqusaarnermi ippassaq unnukkut pisumi taama oqarpoq.
Royal Greenland-imi tunisassiornermik pisortap Lars Nielsen-ip siunnersuutigineqartoq paasisinnaalluarlugu oqarpoq.
- Nunap sumiikkaluartulluunnit soqutigisarivaa nunamini pisuussutigineqartoq naleqarnerutissallugu, Lars Nielsen oqarpoq.
Aalisakkat suliareqqinneqartarnerat naammanngilaq. Kalaallit Nunaat aalisakkanit iluanaaruteqarnerusassappat, aalisagaq tamakkerlugu tunisassiarineqartariaqartoq KNAPK-ip siulitttaasua Leif Fontaine isumaqarpoq.
- Saarullit qeritiinnariarlugit poortoriarlugillu avammut tunisassiarineqartarput, saarulliit niaqui qimerlui atorluarneqaratik igiinnarneqartarput tamannalu atornerluinertut allaat taasariaqarpoq, KNAPK-ip siulilttaasua Leif Fontaine taama oqarpoq.
Royal Greenland-ip nunatsinni aalisakkanik suliffissuini aalisakkat suliareqqinneqartarput, tunisassiornermik pisortaq Lars Nielsen oqarpoq.
- Nunatsinni suliarineqarsinnaasut tamaasa suliarisarpagut. Aalisakkat tunisassiarineqarnerinut atatillugu suliffinnik nutaanik ukioq naallugu sulliffiusunik 40-nik siorna pilersitsivugut, taakkua qalerallit tulaanneqartut suliareqqinneqartarnerinik suliaqarput , Royal Greenland-imi tunisassiornermi pisortaq Lars Nielsen oqarpoq.
Aalisakkanik suliffissuit Qasigiannguani Uummannami Paamiunilu aalisakkanik pisiareriaannanngorlugit suliaqartartut Lars Nielsen oqarpoq.
