Republikanerit senatimi pissaaneqaleriaannaapput

USA-mi naalagaaffeeqqap South Dakota-p senatoriisa aappaat, demokratineersoq Tim Johnson, perululersimavoq, pinasuartumillu qaratsamigut suliaritittariaqarsimalluni. Washingtonimi napparsimmaviit ilaat taama nalunaaruteqarpoq.

Tim Johnson ukiut sisamat matuma siornatigut senatoritut qinigaavoq, ukiullu marluk qaangiuppata aatsaat qinigassanngorteqqissinnaassalluni.

Tim Johnsonili toqussagaluarpat, arlaatigulluunniit tunuartitaassagaluarpat, taava South Dakota-p guvernøria taartissamik toqqaasariaqassaaq.

South Dakota-mi guvernøri republikaneriuvoq, parteeqatiminillu toqqaanissaa ilimagineqarpoq.

Taamaalisoqassappat senatimi pissaanermi oqimaaqatigiinneq allanngussaaq. Senatimi ilaasortat katillutik 100-juupput, taakkunanngalu demokratit 51-iupput republikanerillu 49-uullutik.

Tim Johnsonip issiavia republikanerimit taarserneqassagaluarpat senatimi demokratit republikanerillu naligiilissapput, tamarmik immikkut 50-inik ilaasortaatitaqalissagamik.

Taamaalinikkut senatimi siulittaasoq aalajangiisunngussaaq.

Senatip siulittaasua tassaassarpoq USA-mi præsidentip tullia, taasinerillu naligiikkaangata taassuma taasinera aalajangiisuusarpoq.

Dick Cheney republikaneriummat taamaalilluni republikanerit senatimi pissaaneqaleriaannaapput.