Republikanerit pissaaneq tigoqqippaat

Amerikami inuit suliffissaleqinermik aamma aningaasarsiornermik unittoorsimasumik qatsussisimasunik ikiortilerlutik, Republikanerit Repræsentanternes Husimi sinniisoqarfimmi pissaaneq ippassaq tigoqqippaat.
novembarip 03-at 2010 11:07

Taamaalillutillu partii nutaamik siuttortaarpoq, tassalu John Boehner, Ohio-mi qinigaasoq, siunissami Repræsentanternes Husimi siulittaasussaq. Siunissami præsident Obamap inatsisinik nutaanik eqqussiniaruni isumaqatiginninniarfigisartagassaa.

Kisianni politikerit taakku marluk akornanni pissutsit ajorluinnarput.

Aajuna, John Boehner, Senatimi kamassuaartoq præsident Obamap peqqissutsimik ingerlatsinermut allannguinerata piviusunngortinneqarnera kamaatigigaa.

-Oqaatigineqarsinnaava ammasumik suliarineqartoq, takuneqarsinnaasoq akisussaassulimmik suliaq, matut matunagit isertuussaqarani suliaq.

Naamerluinnaq, taamaattoqanngilaq, taama oqarpoq John Boehner, Republikaneritut siornagut ikinnerussuteqartoq, maannali Innuttaasut sinnerlugit sinniisoqarfimmi amerlanerussutilik.

Isumaqatigiissuteqarpugummi Boehner uangalu, taama qanittukkut præsident Obama oqarpoq Boehner pillugu, uattulli qernertormiuuvoq, naak qalipaat taanna nalinginnaasumik nassaasaanngikkaluartoq. Qalipaataa apeqqutaatinnagu Boehner inuinnaat akornanneersuuvoq, qatanngutigiit aqqanillit akornanni Ohiomi piitsuulluni alliartortoq, angut pikkorissoq nammineerluni pilersittoq. Obamap angut nalilerpaa angutitut inuussutissarsiutinut isersimalluartoq, suliffissuaatilinnit millionionilikkaanik tapersorneqartoq, pujortartupilussuartut tupanik tunisassiortunit aningaasarpassuarnik pissarsisarpoq, suliffippassuillu tunuarsimaanngillat angalanerpasuinut aningaasaliinissamut, minnerunngitsumik golferiartarfinnut akimasuunut timmisartulerluni jet-imik nammineq pigisamik.

Nammineq taasarpoq angut inuinnarneersutut piginnaasani naapertorlugit inuusoq, angut Obamamut oqariartuutilik politikkikkut malunnaatilimmik allamut saaqqullugu, Danmarkip Radioa taama tusagassiivoq.