Republikanerit ajorsassangatinneqarput
Ukioq manna novembarip ulluisa arfineq-aappaanni USA-mi inatsisartunut qinersisoqassaaq, Republikanerillu ajorsarujussuarnissaat ilimagineqarpoq.
Aviisi ullormut saqqummersartoq USA Today, kiisalu Time Magazine inunnik isumasiuineranni tamanna paasinarsivoq.
Ullumikkut qinersisoqartuuppat Demokratit 54 procentinit qinerneqassagaluarput, Republikanerillu 39 procentinit qinerneqassagaluarlutik.
Republikanerip Repræsentanternes Hus-imut ilaasortap Mark Foley-p, qarasaasiakkut atoqateqarnissamik kajumissaarinerata kingunerisaanik USA-mi naalakkersuisuutitallit Republikanerit ajornartorsiulersimapput.
Republikanerit Repræsentanternes Hus-imi siulittaasuata Dennis Hastert-ip Mark Foley-p nukappiaqqanut atoqateqarnissamut soqutiginninnerujussua ukiuni arlalinni ilisimaarisimammagu, USA-mi naalakkersuisut ajornartorsiulersimapput.
Naak Dennis Hastert tunuaqquneqarsimagaluartoq, præsident George W. Bushimit tapersersorneqarpoq.
Pisimasoq pillugu kongres-imi ataatsimiititaliaq paasiniaaleruttorpoq.