Rektori: Ilinniartitsinermut Periusissaat tupaallannartoqanngilaq
Ilinniartitsisunngorniartarnerup pitsaanerulernissaa anguniarlugu, Naalakkersuisunit tamanna misissorneqassasoq kissaatigineqarpoq, ilaatigut ilinniartitsisunngorniartarnerup ullutsinnut naleqqunnerulernissaa kissaatigineqarluni.
Ilinniartitsisunngorniartarnerli ullutinnut naleqqussagaareersoq, Ilinniarfissuup rektoriata, Dorthe Korneliussenip oqaatigaa.
- Isumaqarpugut ilinniartitsisunngorniartarneq ullutsinnut naleqqussagaajuartoq, tassami ingerlaavartumik naleqqussaajuarpugut, atuarfeqarnermut inuiaqatigiillu piumasaqaataanut tunngasut nalilersorlugit taavalu ilinniartitsisunngorniarnermut ilannguttarlutigit, Dorthe Korneliussen oqarpoq.
Naalakkersuisut Ilinniartitsinermut Periusissaanni aamma anguniarneqarpoq, aalajangersimasumik sammivilimmik ilinniarnermik aaqqissuussinerup allanngortinneqarnissaa, taamaalilluni ilinniartitsisunngorniarnermi fagit ilinniagarineqarneri aallaavigalugit meeqqat atuarfiini ilinniartitsissutigisalernissaq anguniarneqarluni.
- Tassa imaakkami, atuartitsisutigineqartartut angisuut, kalaallisut, qallunaatut, tuluttut matematikkilu aasaruminngaannit nukittorsarneqartussaammata, siornali piareersaanerit aallartippavut. Ilinniartitsisunngorniat maanna qinersitittalerpavut faginut pituttorsimanerusunngorlugit, taamaalilluta angussagatsigu ilinniartitsisunngornerminni fagit pikkoriffiginerullugit atuartitsissutigilersinnaanissaat, Dorthe Korneliussen oqarpoq.
Naalakkersuisunit anguniarneqarportaaq, meeqqat immikkut atuartinneqarnissaminnik pisariaqartitsisut, ilinniartitsisuisa nukittorsarneqarnisaat, tamannalu anguniarneqassaaq ilinniartitsisunngorniarnerup ingerlanerani.
Tamannali aamma aallartereersoq, Ilinniarfissuup rektoriata oqaatigaa.
- Ilinniartitsisunngorniarnermi perorsaaneq ilinniartitsissutigineqartarpoq, meeqqat immikkut pisariaqartitsisut eqqarsaatigalugit. Tamannalu aamma annertusaaffigilerparput, immikkut perorsaanertut taallugu, taamaalilluta meeqqat pisariaqartitsisut pitsaanerusumik ilinniartinneqartalernissaat anguniarneqarluni.
Namminersorlutik Oqartussanik Ilinniarfissuaq ukiumut 46 million koruuninik tapiissutisisarpoq.