Rekordileeriarneq sikunit unitsinneqartoq

Umiarsuup sinerissami nakkutilliissutip "Ejnar Mikkelsenip" qallunaat umiarsuaani avannamukartuni rekordiliiniarnini taamaatiinnartariaqarsimavaa.
aggustip 23-at 2011 13:31

Rekordi umiarsuarmit assigisaanit "Knud Rasmussen"-imit pigineqarpoq, taassuma avannarpasissuseq 82 grader minutsillu marluk siorna anguvai, aviisip Politikenip nittartagaani ullumi tamanna allaaserineqarpoq.

"Ejnar Mikkelsen" siku pissutigalugu ingerlariaqqissinnaajunnaarsimavoq, naak tikinniakkani qanilligaluarlugu - 122 kilometerit amigaatigileraluarlugit, imaluunniit arrinani ingerlalluni nalunaaquttap akunneri tallimat-arfinillit amigaatigalugit.

Umiarsuup sukkalaartumik ingerlalluni siku 70 centimeterip missaanik issussusilik aqqusaalutorisinnaagaluarpaa, kisiannili tassa Kitaata avannaani siku issuallaarsimavoq.

- Siku meterit marluk missaanni issutigisoq eqqartorparput, annertuvallaarujussuarporlu, Kalaallit Nunaanni Sikumik Aserorterivimmi, silasiorfimmut DMI-mut atasumi, pisortaq, Keld Qvistgaard, oqarpoq.

Qallunaat umiarsuaataat avannaarsuani sungiusarpoq, amerikamiut sinerissami nakkutilliissutaat, US Coast Guardimeersoq, sikusiullaqqissorlu, "Willow", sungiusaqatigalugu. Sungiusarnermi siunertaavoq imaatigut ajunaartunik suleqatigiilluni annaassiniarnissaq aamma periutsinik paasisimasanillu paarlaateqatigiinnissaq.

Pituffimmi atortut misilittarneqassapput, umiarsuarmi ajutoortumi ilaasut annaanniarneqarnerinik pisuusaartitsisoqassalluni. Tamanna sisamanngornermi aggustip ulluisa 25-anni pissasoq pilersaarutaavoq.