Uuliap kinertup inerteqqutigineqarnissaa naalakkersuisooqataasut taperseraat
Danmarkimi Umiarsuaatillit peqatigiiffiata uuliamik kinertumik umiarsuit orsussatut Issittumi atuinissaannut nunarsuaq tamakkerlugu inerteqquteqarnissaq pillugu Naalagaaffiit Peqatigiit Imavinni Angallanneq pillugu Suleqatigiiffiata kimigiiserfigineqarnissaanik danskit naalakkersuisuinut kaammattuuteqarnerata kingorna Venstremit taama oqaatigineqarpoq.
Uuliap kinertup orsussatut atorneqarnera mingutsitsisupilussuuvoq paaliortitsisarlunilu Issittup sikuanut siaruaattartumik kiisalu Issittumi silaannaap kiannerulerneranut pissutaaqataalluni.
Taamatullu siunnersuuteqartoqarnera Venstrep avatangiisit pillugit oqaaseqartartuanit Erling Bonnesenimit nersualaarneqarpoq:
- Taamatut siunnersuuteqartoqarnera ilassilluaannarsinnaavarput. Aamma nunat tamalaat akornanni aaqqinneqartariaqarnera tulluartuuvoq, nunammi ilaannaasa umiarsuaasa uuliamik taama ittumik atuiunnaarnissaat naammanngilaq. Umiarsuarnut tamanut atuuttussanngortinneqartariaqarpoq taamatullu aamma nunat tamalaat akornanni aalajangiinerusariaqarluni.
Nunat assigiinngitsut umiarsuaatileqatigiiffiisa akornanni tulluanngitsumik unammilleqatigiittoqalersinnaanera pinngitsoortinniarlulgu inerteqquteqarneq nunarsuaq tamakkerlugu atuuttariaqartoq Danmarkimi umiarsuaatillit peqatigiiffiat aamma Venstre isumaqarput.
Umiarsuit taarsiullugu orsussaq marinediesel mingutsitsinnginnerusoq atussavaat.
Norge kisiartaalluni ullumikkut inerteqquteqartuuvoq, Norgemiut umiarsuaataat Svalbardip eqqaani imartani uuliamik kinertumik atuinissaat inerteqqutigineqarpoq. Taarsiullugulu orsussaq marinediesel mingutsitsinnginnerusoq atorneqarpoq.
