Red Barnet nunatsinnut tunniussiniarpoq
Suliniaqatigiiffik ”Red Barnet” Danmarkimi nuna tamakkerlugu aningaasanik katersuiniarmat 6 mio. koruunit isertinneqarput. Aningaasat ilarparujussui nunatsinni atorneqassasut oqaatigineqarpoq.
Taama aningaasaliinermi meeqqat sumiginnakkat Danmarkimiittut nunatsinniittullu kiisalu Ugandami meeqqat sakkutuutut atorneqarsimasut eqqarsaatiginerullugit aningaasaliissutaassapput.
Danmarkimi inuit 6.000-t missaanniittut nammineq kajumissutsiminnik sulillutik, matunut kasuttoqattaarlutik aningaasanik katersisimapput, katersarineqartullu ilimagisamit amerlanerusimapput.
- Aningaasat sinneqartoorutaasut affaat sinnerlugit meeqqanut sorsuffinniittunut kiisalu meeqqanut sumiginnakkanut Danmarkimiittunut Kalaallit Nunaaniittunullu ingerlatinneqassapput, suliniaqatigiiffik Red Barnet taama oqarpoq.
