Recep Erdogan AKP-lu ajugaallualaavipput
Tyrkiami ippassaq qinersinermi ministeriuneq Recep Erdogan aamma partii naalakkersuisuutitaqartoq AKP ajugaallualaavipput, tassami qinersisut 47 procentiinit qinerneqaramik.
Klaus Nederby Mortensenip, Syddansk Universitet-imi Kangianik Qiterlermik sammisaqarfimmeersup, taamatut ajugaanermut patsisaasut ima nalilersorpai:
Tamatumunnga pissutaanerpaavoq Tyrkiap aningaasarsiornikkut siuariartornera, tassami 2002-mi AKP ajugaammalli aningaasarsiorneq siuariartorsimavoq, qinersisartullu isumaqarput tamanna killilersuinngitsumik aningaasarsiornikkut politikeqarnermik patsiseqartoq.
Pingaarutillit aappaat tassaavoq, Tyrkiami naalakkersuinikkut aaqqissuussinerup oqallisigineqarnerani sakkutuut pissaaneqarusunnerat, naalakkersuinermillu suliaqartunut akulerunniarsarinerat qinersisartunit nuannarineqanngimmat.
AKP pisuutinneqartarpoq upperisarsiornermik ingerlatsiniarnerusutut, apeqqutigineqarmallu AKP upperisarsiorneq tunngavigalugu allanngortiterinialissanersoq Klaus Nederby Mortensen oqarpoq Tyrkia soorlu Iranimisuut palasiunernit aqunneqalernavianngitsoq. AKP-ip upperisarsiornikkut kiffaanngissuseqarnerulernissaq anguniarniarpaa, soorlu ullumikkut Tyrkiami upperisarsiornermut atatillugu nasartaateqarneq inerteqqutaavoq, partiillu nasartaateqarsinnaanerup eqqunneqarnissaa sulissutigissagunarpaa. Tassa upperisarsiortut pisinnaatitaaffeqarnerulernissaat anguniarniarpaa. Taamaattorli naalakkersuinikkut aaqqissuussinermi upperisarsiorneq annerusumik tunngavigineqarnavianngilaq, tamannami AKP-ip EU-mut qanillattorusunneranut naapertuunnavianngitsoq Klaus Nederby Mortensen naliliivoq.
